Saddex ciyaartoy oo ka tirsan Chelsea ayaa lagu eedeeyey in ay ixtiraam-darro u muujinayaan taageereyaasha kooxdooda, sidoo kalena sabab yu noqonayaan in shaqada laga caydhiyo Graham Potter kaddib markii ay bandhig aad u liita la yimaaddeen ciyaartii Manchester City ay 4-0 ku xasuuqday Axaddii ee ay kaga hadheen tartanka FA Cup.
Chelsea ayaa wareegga saddexaad kaga hadhay FA Cup kaddib markii ay booqatay Manchester City oo afar maalmood ka horna ku karbaashtay Stamford Bridge kulankoodii horyaalka Premier League.
Manchester City ayay u ahayd markii koowaad ee ay si raaxo leh ugu garaacdo Chelsea garoonkeeda Etihad Stadium muddo 25 sannadood ah, waxaanay taasi keentay in wax la iska weydiiyo mustaqbalka tababare Potter oo qorshihiisii xilli ciyaareedka ay kala daadiyeen dhaawacyo.
Halyeygii Chelsea ee Frank Leboeuf ayaa si weyn u weeraray Kai Havertz, Mason Mount iyo Jorginho oo uu ku tilmaamay kuwa sababta u ah guul-darrooyinka kooxda, isaga oo dhinaca kalena kula taliyey maamulka naadiga inay shaqada ka caydhiyaan Graham Potter.
Leboeuf oo Chelsea u ciyaaray in ka badan 200 kulan oo dhamaan tartamada ah muddo shan sannadood ah oo uu joogay Stamford Bridge ayaa yidhi: “Waa Ceeb, runtii waa ceeb. Anigu waligay ma arag Chelsea oo sidan u liidata, maba laha doonis, ma laha damac ma laha dhiirranaan ay ugu dagaallamaan sharafta kooxda, wax sharaf ahba ma laha.
“Wwaxa aan arkayaa ciyaartooyo aan waxba qabanayn, waxay ixtiraam-darro u muujinayaan taageereyaasha iyo kooxda. Haa, aa Mason oo aan jecelahay, Jorginho iyo Kai.”
Si kastaba, Chelsea ayay u ahayd guul-darradii lixaad ee tobankii ciyaarood ee ugu dambeeyey ay la kulmaan, waxaana uu hadda cadaadisku kusii kordhayaa tababare Graham Potter.
