Xiddiga khadka dhexe uga ciyaara Manchester Unitede ee Scott McTominay ayaa diiday inuu beddelo lambarkii ugu horreeyey ee ay Red Devils u xidhay markii uu kasoo dallacay kooxda da’yarta, kaas oo uu qorshuhu ahaa inuu si ku-meelgaadh ah u haysto, si haddii uu qaab ciyaareed fiican la yimaaddo loogu wareejiyo lambar gaaban.
Scott McTominay oo ay da’diisu tahay 26 jir ayaa waxa uu Red Devils u xidhnaa No.39 illaa markii uu ku jiray kulliyadda da’yarta, waxaana markii uu usoo dallacay kooxda koowaad sannadkii 2017 uu ku adkaystay in aanu beddelay.
Laacibkana oo 194 kulan u saftay kooxda koowaad ee Manchester United, una dhaliyey 18 gool iyo shan kale oo uu caawiyey, ayaa la sheegay in aanu doonayn inuu beddelo No.39 oo uu cimrigiisa oo dhan xidhnaa, waxaana uu sharraxay sababta uu u doonayo inuu haysto lambarkan inta uu xidhan yahay shaadhka Manchester United.
Waraysi uu siinayay website-ka kooxdiisa, ayaa lagu weydiiyey sababta uu u diiday inuu beddelo lambarkan, waxaanu ku jawaabay: “No.39 waa mid khaas ah, marka uu noqdo lambarka u horreeya ee lagu siiyo.
“Waligay qofna iguma odhanin iska beddel lambarkaaga, mana jirto cid aanu ka wada hadalnay in aan lambarkayga beddelo. Ma dhicin saddex sannadood, lama sannadood ama xataa hal sano ka hor cid igala hadashay.
“Aniguna waligay isma weydiinin ama kama fikin in aan beddelo lambarkan, sababtoo ah waxa aan dareemayaa in uu yahay midkii ugu habboonaa, haddana waxa aan arkaa iyadoo No.39 uu meel walba yaallo, markaa maskaxdayda kuma jirto in aani beddelo.”
Scott McTominay ayaa waxa maalmihii ugu dambeeyey ay saxaafadda Ingiriisku warinaysay inay suurtogal tahay inuu ka tago Mnchester United, waxaana kooxaha lala xidhiidhinayo ka mid ah Newcastle United oo si weyn u doonaysay tan iyo xagaagii.
