Dad badan ayaa isweydiinayay sababta Sergio Aguero oo ciyaaraha ka fariistay 12 bilood ka hor uu u helay bilada hanashada Koobka Adduunka inkastoo uusan qeyb ka aheyn xulkii ciyaaray.
Aguero oo sababo caafimaad darteed uga fariistay ciyaaraha bishii Decmeber ee sannadkii la soo dhaafay ayaa la dabaaldegay ciyaartoyda xulka Argentina ka dib markii ay finalkii rigoore uga badiyeen France.
Waxaa la arkayay isagoo xirtay maaliyada xulka Argentina islamarkaana la dabaaldegaya ciyaartouda, wuxuu xitaa kor u hayay Koobka Adduunka.
Sawiro qolka labiska looga qaaday ayaa lagu arkay Aguero oo heysta bilada guuleystaha Koobka Adduunka, waxaana la isweydiinayay sababta uu ku helay.
Ciyaartoyda iyo tababaraha waxaa biladaha gudoonsiiyay madaxdii xaflada joogtay laakiin waxaa sidoo kale biladaha helayay shaqaalaha tababarka.
Sidaasi darteed shabakada Givemesport ayaa sheegeysa in Argentina ay si rasmi ah ugu diiwaangelisay Sergio Aguero “Caawiyaha Tababaraha” ka hor kulankii finalka sidaasi darteedna uu helay bilada guuleystaha ee Koobka Adduunka.
Aguero ayaa jeclaan lahaa inuu ka garab ciyaaro saaxiibkiisa ay aadka isagu dhow yihiin ee Lionel Messi islamarkaana uu la qaado koobka laakiin xaalad caafimaad ayaa u diiday.
Argentina ayaase ku sharaftay weeraryahanka halyeeyga ah inuu qeyb ka noqdo guushooda oo uu helo bilada guuleystaha ee Koobka Adduunka.
