Khabiirka kubadda cagta ee Paul Merson ayaa saadaaliyey kulamada adag ee horyaalka Premier League ee toddobaadkan, kuwaas oo natiijooyinkoodu si buuxda saamayn ugu yeelan doonaan miiska kala-sarraynta horyaalka ee kaalmaha sare.
Kooxda hoggaanka horyaalka haysa ee Arsenal ayaa waxay garoonkeeda Emirates Stadium ku martigelin doontaa Tottenham iyaga oo usbuucii horena barbarro goolal la’aan ah la galay Newcastle United xilli ay caddaalad-darro kaa tirsadeen garsoorihii kulankaas.
Manchester Derby ayaa la sugayaa oo Sabtida garoonka Old Trafford ku kulminaya Manchester United iyo Manchester City oo kaalmaha labaad iyo afraad kaga jira miiska kala-sarraynta. Haddii ay United guuleysato waxay u dhowaan doontaa City iyadoo dhinca kalena fursad siinaysa Arsenal oo siddeed dhibcood ku qaban karta hoggaanka balse waa inay iyaguna ka badiyaan Tottenham.
Liverpool ayaa uu imtixaan adag sugayaa, waxaanay marti u noqonayaan Brighton & Hove Albion, iyadoo usbuucii horena ay Brentford kusoo karbaashtay 3-1.
Paul Merson, waxa uu bixiyey saadaal inta badan kooxaha isku-garab ridaysa oo dhibcaha lagu wadaagayo, gaar ahaan naadiyada waaweyn. Ciyaarta London Derby ee Arsenal iyo Tottenham ayaa uu Merson sheegay inay ku dhamaan doonto 2-2 taas oo haddii ay dhacdo noqonaysa markii koowaad ee laba ciyaarood oo xiidhiidh ah ay Gunners dhibco lumiso xilli ciyaareedkan.
Waxa kale oo min laba gool iska dhalin doonta Manchester United iyo Manchester City, halka Brighton ay qaban doonto Liverpool oo ay dhibcaha wadaagi doonaan.
Chelsea ayaa waxay ciyaarteeda Fulham ee caawa sii wadan doontaa niyad-jabka sida ay sheegayso saadaasha Paul Merson, balse waxay Blues jidka guusha kusoo laaban doontaa Axadda oo ay qaabbili doonto Crystal Palace.
Saadaasha Paul Merson ee kulamada horyaalka Premier League ee usbuucan
Fulham 1-1 Chelsea
Aston Villa 3-1 Leeds United
Manchester United 2-2 Manchester City
Wolverhampton Wanderers 1-0 West Ham United
Nottingham Forest 1-0 Leicester City
Brighton & Hove Albion 2-2 Liverpool
Everton 2-0 Southampton
Bournemouth 0-3 Brentford
Chelsea 2-0 Crystal Palace
Newcastle United 2-0 Fulham
Tottenham Hotspur 2-2 Arsenal
