Wayne Rooney ayaa ka hadlay go’aankii ay Manchester United caawa ku kansashay qandaraaskii Cristiano Ronaldo.
Xiddiga reer Portugal ayaa ka tagay Old Trafford markii labaad ka dib markii Red Devils ay jeex-jeexday qandaraaskiisa caawa oo Arbaco ah.
Ronaldo ayaa wareysi uu siiyay Piers Morgan todobaadkii hore wuxuu ku weeraray kooxda iyo tababaraha, taasoo keentay go’aanka ay caawa qaadatay kooxda.
Kabtankii hore ee England Rooney ayaa sheegay inuu sugayay go’aankii ay qaadatay United.
Rooney ayaase markaan ka baaqsaday inuu si shaqsi ah u weeraro xiddiga reer Brazil isagoo ku tilmaamay inuu adeege fantastik ah u ahaa kooxda una rajeynayo mustaqbal wanaagsan.
Isagoo ka hadlayay TV-ga Sports 18, Rooney ayaa yiri: “La yaab miyay igu tahay ceyrintiisa? Maya.
“Kooxda wado kale uma furneyn laakiin waa ceeb inay sidaan ku soo dhamaato sababtoo ah adeege fantastik ah ayuu u ahaa kooxda.
“Waxaan u rajeynayaa wanaag meel kasta uu aado.”
Dhanka kale Rio Ferdinand oo isna ay sidoo kale Ronaldo soo wada ciyaareen ayaa ka hadlay go’aanka Manchester United isagoo sheegay in dhinac walba ay heleen wixii ay rabeen.
Wuxuu u sheegay BBC: “Waxaan aaminsanahay in dhinac walba uu faraxsan yahay haatan. Sida iska cad wuxuu wareysigaas u bixiyay isagoo ogsoon inuu doonayay inuu kooxda ka tago.
“Ma uusan faraxsaneyn, taasna si cad ayuu u sheegay.
“Erik ten Hag wuxuu helay wixii uu rabay. Labada dhinac way faraxsan yihiin sidaas darteed aan u dhaqaaqno cutubka xiga ee Cristiano Ronaldo.”
