Kyle Walker ayaa ballan-qaaday in uu halgan adag la geli doono xiddiga reer France ee Kylian Mbappe kulanka Sabtida ee wareegga siddeedda Koobka Adduunka ee England iyo France ay garoonka Al Bayt Stadium ku ballansanyihiin.
Mbappe ayaa noqday hadal-haynta ugu badan ee Koobka Adduunka markii uu hoggaanka u qabtay tartanka kabta dahabka ah ee gool-dhalinta oo uu shan gool saxeexay afar ciyaarood gudahood, waxaana la is-weydiinayay difaaca uu tababare Gareth Southgate usoo xulan doono sidii uu u joojin lahaa.
Walker oo hore ay ugu soo xafiiltameen tartanka Champions League ayaa taam u noqday xulka England oo labadii ciyaarood ee u dambeeyey kusoo bilowday isaga oo seegay labadii ciyaarood hore, waxaana saxaafadda oo uu la sii hadlay uu ku dhaartay in aanu ‘roog cad u dhigi doonin Mbappe’.
Waxa kale oo uu Kyle Walker sheegay in aanu wax ixtiraam ah u muujin doonin Mbappe oo uu halganka ugu adag ee suurtogalka ah la geli doono, waxaanau yidhi: “Ciyaartu ma aha mid u dhaxaysa England iyo Mbappe, balse waa mid u dhaxaysa England vs France.
“Waanu ixtiraami doonaa, laakiin anigu roog cad u dhigi maayo isaga si uu gool u dhaaliyo. Waa nolol ama geeri sababtoo ah haddii aanu guul-darraysano waxa aanu ku laabanaynaa waddankayagii.”
Mar la weydiiyey sida uu u joojin karayo Mbappe, waxa uu ku jawaabay: “Waan fahamsanahay waxa aan u baahanahay in aan sameeyo, waana in aan joojiyo isaga. Way fududahay in afka laga hadlo marka ay noqoto in ficil la sameeyo, laakiin anigu hoos iskuma dhisayo.
“Waxa aan hore uga hor tegay ciyaartooyo waaweyn, markaa waxa aan ula dhaqmayaa sidii ciyaar kale uun. Waan siin doonaa ixtiraamka uu u qalmo, laakiin ma noqon doono ixtiraam badan sababtoo ah ciyaartani waa xulka England.”
