Halyeygii Liverpool iyo xulka Englaand ee Jamie Carragher ayaa sheegay inuu soo dhamaaday mustaqbalka Cristiano Ronaldo markii uu waraysiga siiyey wariyaha ciyaaraha ee Piers Morgan ka hor intii aanu bilaabmin Koobka Adduunka ee Qatar, laakiin xiddigii ay xafiiltamayeen ee Lionel Messi uu is-muujiyey oo uu ku guuleystay koobkii ugu weynaa ee uu raadinayay oo ah Koobka Adduunka.
Ronaldo oo bishii November ay Manchester United burburisay heshiiskiisa kaddib waraysi uu siiyey Piers Morgan ayaa waxa uu u wareegayy kooxda Sucuudiga ee Al-Nassr FC oo sannadkii mushahar u siinaysa £175 milyan oo Gini, taas oo ka dhigaysa xiddiga ugu mushaharka badan guud ahaan dunida kubadda cagta.
Lionel Messi ayaa isaguna isku qoray buugga taariikhda kubadda cagta, waxaana uu ku biiraya liiska siddeed ciyaartoy oo hore ay ku jireen oo ah xiddigaha ku guuleystay Koobka Adduunka, Ballon d’Or iyo Champions League.
Jamie Carragher oo ka hadlayay telefishanka Sky Sports ayaa yidhi: “Dhamaad murugo leh ayay u tahay. Ronaldo waxa uu waayihiisa ciyaareed kusoo dhamaaday waraysigii Piers Morgan, halka uu Messi ku guuleystay Koobka Adduunka.”
Cristiano Ronaldo ayaa sameeyey cinwaannada waaweyn ee warbaahinta markii uu xagaagii iska diiday inuu kooxdiisa u raaco safarkii ay ku tageen waddamada Thailand iyo Australia, iyadoo bishii November na uu bixiyey waraysi gilgilay United oo uu eedaymo ugu jeediyey Erik ten Hag, kooxda iyo sidoo kale mulkiileyaasha Red Devils.
Waxa kale oo uu eedeeyey tababarihii hore ee Man United ee Ralf Rangnick iyo tiro halyeeyadii hore ee Manchester United ah sida Gary Neville iyo Wayne Rooney, waxaanay taasi keentayin Manchester United ay burburiso heshiiskii ay kula jirtay.
