Xulka qaranka Brazil ayaa wali raadinaya tababare kaddib markii uu iska casilay Tite bishii December waxaana jira tiro tababareyaal ah oo lala xidhiidhinayo in uu midkood noqon doono macallinka cusub ee uu xidhiidhka kubadda cagta Brazil magacaabi doono.
Tababarihii hore ee kooxda Santos ee Tite oo labadii Koob Adduun ee ugu dambeeyey hoggaaminayay xulka qaranka Brazil, ayaa hore loosii ogaa inuu ka tegayo xulka balse waxa uu ku degdegay go’aankiisa markii ay Croatia ku garaacday rikoodheyaal wareeggii siddeedda Koobka Adduunka.
Xidhiidhka kubadda cagta Brazil ee magaciisa loosoo gaabiyo CBF ayaa la rumaysan yahay in ay doorbidayaan in ay tababare ajaanib ah u dhiibaan xulkooda markiiugu horreysay taariikhda, sababtana waxa lagu sheegay in ay beddelayaan falsafaddooda ciyaareed kaddib 20 sannadood oo ay gacmo madhan ka taagan yihiin Koobka Adduunka.
Ciyaartoydii hore ee xulka qaranka Brazil ayaa fikradahooda ka dhiibanaya tababaraha ay tahay in la magacaabo, laakiin intooda badan ayaa isku raacsan in markan loo baahan yahay macallin ajaanib ah, waxaana magacyada lala xidhiidhinayo ka mid ah Zinedine Zidane, Jose Mourinho, Pep Guardiola iyo Luis Enrique.
Sida uu qoray wargeyska Sport, Ronaldo Nazario ayaa u bandhigay CBF in uu doonayo inuu qaato doorka dhexdhexaadinta iyo raadinta tababaraha cusub, si uu dalkiisa uga caawiyo inay helaan macallin reer Yurub ah oo ku habboon shaqada loo dhiibayo.
Ronaldo ayaa la sheegay in aanu shaki ku jirin inuu ku fiican yahay shaqada dhaxdhaadinta iyo qancinta dadka isaga oo isticmaalaya sumcaddiisii ciyaartoynimo iyo hadda oo uu yahay mulkiilaha kooxda reer Spain ee Real Valladolid iyo sidoo kale Cruizero oo ka dhisan dalkiisa Brazil.
