Barcelona ayaa xaqiijisay in weeraryahankeeda Robert Lewandowski uu ciyaari doono kulanka Derby-ga ah ee Espanyol ee Sabtida ee ay martida yihiin, kaddib markii rafcaan ay ka qaateen ganaax saddex ciyaarood ah oo la saaray laacibkan.
Robert Lewandowskio ayaa casaan la siiyey ciyaartii Osasuna ee ka hor koobkii adduunka, iyadoo garsooruhu uu laba kaadh oo digniin ah isku raaciyey 31 daqiiqadood gudahood.
Barcelona ayaa inkasta oo Lewandowski laga saaray waxay xoogsatay saddexd dhibcood iyag oo 2-1 ku adkaaday. 34 jirkan ayaa markaas kaddib waxa lagu riday ganaax laba ciyaarood ah oo dheeraad ah iyo ciyaartii uu marka horeba casaank ku maqnaan lahaa, iyadoo garsooraha ciyaartu uu sheegay inuu aflagaado iyo anshax xumo ku kacay.
Rafcaan ay Barcelona hore uga qaadatay ganaaxan ayaa waxa soo diiday guddida Rafcaank ee xidhiidhka kubadda cagta Spain, kaddibna Barcelona ayaa tagtay maxkamadda CAS oo ay rafcaan u qaadata taas oo iyaduna raacday ganaaxii hore ee guddida anshaxa ee Spain ee saddexda ciyaarood ahaa.
Barca intaa kuma aanay joogin, waxaanay mar kale tagtay maxkamadda Madrid oo ka aqbashay rafcaanka oo dib loo eegayo, waxaanay taasi keentay in Lewandowski loo ogolaado ciyaarta Sabtida inkasta oo aanay wali maxkamaddu go’aan rasmi ah soo saarin.
War-saxaafadeed ay Barcelona soo saartay ayaa lagu yidhi: “Robert Lewandowski waxa uu ciyaari doonaa kulanka berri ee Espanyol kaddib markii ay maxkamadda dhexe ee Madrid ogolaatay rafcaan ah in la qaado tallaabo hordhac ah oo la xidhiidha ganaaxii ay soo rogtay TAD.”
