Difaacii hore ee Chelsea ee Robert Huth ayaa saadaal cusub ka sameeyey horyaalka Premier League ee xilli ciyaareedkan, waxaanu ka nixiyey naadigiisa hore oo uu u sheegay in ay ka maqnaan doonaan Champions League xilli ciyaareedka dambe, kaddib markii ay shaqada ka caydhiyeen Thomas Tuchel.
Robert Huth oo u dhashay waddanka Germany ayaa rumaysan in Chelsea aanay lahayn kartidii iyo awooddii ay kaga mid noqon lahaayeen afarta kooxood ee sare ee Premier League ee xilli ciyaareedkan, inkasta oo ay sameeyeen isbeddel dhinaca tababaraha ah.
Tababaraha cusub ee Chelsea ee Graham Potter oo xilka kala wareegay Thomas Tuchel oo shaqada laga caydhiyey markii uu ciyaartiisii 100aad layliyey Blues ayaa waxa uu saadaaliyey, in afarta sare ay ka mid noqon doonto Tottenham halka Manchester United ay iyaduna sannadkan degdeg ku noqonayso haddii loo saadaaliyo in ay afarta sare imanayso, maadaama uu Erik ten Hag hadda uun bilaabay isku-dubbaridka kooxdiisa.
“Aniga aragtidayda kaalinta afraad ee sannadkan ee Chelsea way isbeddeshay kaddib shaqo ka caydhintii Thomas Tuchel.” Ayaa uu yidhi Robert Huth, waxaanu sii raaciyey: “Waxa aan rajaynayay in Chelsea ay afarta sare ka mid noqon doonto khaasatan markii ay ciyaartoyda cusub soo iibsadeen xagaagii, laakiin hadda ma arkayo in ay sidaas samayn doonaan.
“Waxay ila tahay in Arsenal ka mid noqon doonto afarta sare. Waxay kharash gareeyeen lacag maalgelin ah, waqtigana waa la siin doonaa Mikel Arteta, markaa haddii ay afarta sare iman waayaan khasaare ayay ku noqon doontaa.”
Huth waxa uu sheegay in afarta sare ay noqon doonaan kooxaha reer London ee Tottenham, Arsenal iyo labada naadi ee kale ee Manchester City iyo Liverpool.
Si kastaba, Huth ayaa muddo afar sannadood ah u ciyaaray Chelsea, ka hor intii aanu uga wareegin Middlesbrough, Stoke City iyo Leicester City oo uu kusoo qaatay waqti qurux badan intii aanu kabaha tiirin.
