Halyeyga Manchester United iyo xulka qaranka England ee Rio Ferdinand ayaa magacaabay xiddiga ugu fiican horyaalka Premier League xilli ciyaareedkan socda, waxaana uu indhaha ka laliyey Erling Haaland oo goolal badan dhaliyey, isaga oo ku dooday inuu jiro ciyaartoy kale oo ka wanaagsan.
Rio Ferdinand ayaa waxa uu sheegay, in isaga aragtidiisa uu xiddiga ugu wanaagsan horyaalku uu yahay kubbad-sameeyaha Arsenal ee Martin Odegaard ee ay isku-waddanka yihiin Haaland.
Odegaard oo ah kabtanka Arsenal ayaa waxa uu bandhig heersare ah ka samaynayaa garoomada isaga oo kooxdiisa ka caawiyey inay siddeed dhibcood ku hayso hoggaanka.
Ciyaartii Tottenham ee Axaddii ayuu mar kale iskusii muujiyey Odegaard oo gool uu meel fog ka toogtay dhaliyey, halka uu sidoo kale birta garaacay, waxaanay taasi keentay in Ferdinand uu u doorto xiddiga sannadka.
“Odegaarrd waan jecelahay dariiqa uu soo maray. Waxa uu ahaa xiddig weyn isaga oo 16 jir ah markii uu yimid Real Madrid, qof kastaana waxa uu sheegayay inuu noqon doono xiddig.” Ayuu ku bilaabay Rio Ferdinand, waxaanu raaciyey: “Illaa hadda sida ay wax u socdaan, isaga ayaa ah xiddigayga sannadka. Haaland wuu sameeyey wixii uu samayn lahaa, waxa uu ahaa ciyaartoy wanaagsan, hana i qalad-fahmina. Haddii Haaland uu Haaland sii wado goolasha, balse ay Arsenal ku guuleysato horyaala oo uu Odegaard sii wado bandhiggiisa, isaga ayaa noqonaya ciyaartoyga ugu wanaagsan sannadka.”
