Rio Ferdinand ayaa rumaysan inay waqti hore tahay, in la xukumo xiddiga Liverpool ku dhibaatoonaya ee Darwin Nunez, waxaana uu barbar-dhigay gool-dhaliye Manchester United u ciyaari jiray oo wacdaro ka dhigi jiray garoomada, kaas oo uu tilmaamay waxyaabo ay isku mid ka yihiin.
Nunez oo Liverpool ay xagaagii £85 milyan oo Gini kaga soo iibsatay Benfica ayaan illaa hadda si buuxda u saldhigin Anfield, waxaanay dhibaatadiisu tahay goolal la’aan iyo fursadaha uu helo oo uu khasaarinayo.
21 ciyaarood oo dhamaan tartamada ah oo uu saftay ayuu dhaliyey sagal gool iyo saddex uu caawiyey, balse waxa culays ku ah tirada fursadaha uu luminayo ciyaar kasta oo aad u badan iyadoo dhinaca kalena halbeeg looga dhigayo Erling Haaland oo ah mishiinka goolasha Man City.
Rio Ferdinand ayaa sheegay in Darwin Nunez uu la qabsan doono horyaalka Premier League, waxaana uu barbar-dhigay gool-dhaliyihii ay isku waddanka ahaaeen ee Diego Forlan, waxaanu yidhi: “Waa in aad taxadarto marka aad ka hadlayso dadka sida Nunez oo kale ah.
“Aniga waxa uu isoo xasuusiyaa Diego Forlan, bilowgii hore kuma fiicnayn goolasha, laakiin markii dambe laba jeer ayuu ku guuleystay kabta dahabka ah ee Yurub, waxaanu noqday ciyaartoy weyn oo Uruguay ah iyo kooxo badan oo uu u ciyaaray.
“Waxay ila tahay in Nunez ay isku mid yihiin, waanu sameeyaa fursado. Anigu aad ayaan uga walaacsanaan lahaa haddii aanu fursado heli lahayn.
“Wali ciyaartiisu way koraysaa maadaama uu yahay ciyaartoy da’yar, waxayna ila tahay in uu wax badan samayn doono.”
Diego Forlan ayaa Manchester United ku dhibaatooday sida Nunez oo kale, waxaana dafiray gool-dhalinta isaga oo 98 ciyaarood oo uu u saftay kaliya dhaliyey 17 gool, laakiin kooxaha Villarreal iyo Atletico Madrid ayaa uu ka noqday mishiin gool-dhalinta ah, waxaana 324 kulan uu ugu dhaliyey 154 gool.
Sannadkii 2011 ayuu xulkiisa Uruguay u qaaday Copa America, sidoo kalena waxa uu ku guuleystay Kubadda dahabka ah ee ciyaartoyga ugu wanaagsan iyo kabta dahabka ah ee Koobkii Adduunka 2010 oo uu xulkiisu kaalinta afraad ku dhamaystay.
Rio Ferdinand oo ka hadlaya sida uu Forlan u noqday gool-dhaliye cajiib ah iyadoo uu Old Trafford ku fashilmay, waxa uu yidhi: “Tababarka ayaad ku garanaysay in Diego Forlan ahaa ciyaartoy cajiib ah. Dhamaystirkiisa labada lugoodba layaab ayay lahaayeen.
“Waxa uu ka mid ahaa ciyaartoyda ugu cajiibsan waqtiga tababarka. Wuxuu samayn jiray tababar adag, mar walbana wuxuu u shaqayn jiray sidii wax waalan.
“Waxa aan jeclaan lahaa in aan la hadlo Virgil van Dijk ama Jordan Henderson ama Trent Alexander-Arnold ama qof kasta oo Liverpool ah, haddii uu Nunez goolal ku dhaliyo tababarka. Waxa aan weydiin lahaa, miyuu si fiican u dhaliyaa goolasha waqtiga tababarka mise uma dhaliyo?
“Haddii aanu u dhalin, markaa Nunez waxa uu ku dambaynayaa sidii Folan oo kale.”
