Kooxda kubadda cagta Real Madrid ayaa liiska ciyaartoyda ay doonayso ku darsatay weeraryahanka Liverpool ee Darwin Nunez, kaas oo tababare Carlo Ancelotti uu qorshaynayo inuu ku beddelo Karim Benzema oo ay da’diisu noqonayso 35 jir dhamaadka bishan December.
Darwin Nunez oo Liverpool ay xagaagii kaga soo iibsatay Benfica lacag gaadhaysa £85 milyan oo Gini isla markaana ku dhibaatooday la qabsiga horyaalka Premier League ayay Real Madrid si lama filaan ah ugu darsatay liiska ciyaartoyda ay doonayso.
Wargeyska Defensa Central ee kasoo baxa waddanka Spain ayaa sheegay, in Real Madrid ay si weyn u doonayso Nunez oo waliba suuqa iibka ciyaartoyda ee xagaaga u xidh-xidhan doonto sidii ay ku keeni lahayd Santiago Bernabeu.
Carlo Ancelotti oo ka walaacsan taam ahaanshaha Karim Benzema oo dhaawac kaga maqan Koobka Adduunka, isla markaana inta badan xilli-ciyaareedkan ku qaatay miiska daaweynta ayaa uu rumaysan yahay in xilli ciyaareedka dambe aanay kooxdu isku hallayn karayn Benzema.
Liiska weeraryahannada ay Real Madrid oonayso waxa kale oo ku jira tiro ciyaartooyo caan ah, sida xiddigaha Brazil ee Richarlison iyo Gabriel Jesus ee u kala ciyaara Tottenham iyo Arsenal iyo waliba gool-dhaliyaha xulka qaranka Netherlands iyo kooxda PSV ee Cody Gakpo.
