Kooxda kubadda cagta Real Madrid ayaa dib usoo celinaysa colaaddii caanka noqotay ee Barcelona, waxaanay ku celinayaan afduubkii Luis Figo ee sannadkii 2000 oo kale, iyaga oo hadda u xidh-xidhay inay Camp Nou kasoo qafaashaan xiddig da’yar oo uu si weyn ugu xisaabtamayo tababaare Xavi Hernandez.
Ciyaarta Intercity ee tartanka Copa del Rey ayaa waxa uu Xavi ka fiirsanayaa inuu ugu yeedho xiddiga ay Real Madrid afduubkiisa qorshaynayso, waana da’yarka reer Morocco ee Lamine Yamal oo kulliyadda da’yarta La Masia ku jira.
Yamal ayaa ka mid ah ciyaartoyda da’yarta ah ee ugu fiican qaaradda Yurub ee da’diisa, waxaana indhaha ku haya kooxo waaweyn oo raadinaya dariiqii ay Barcelona kaga soo qaadan lahaayeen, kuwaas oo ay ugu horreyso Real Madrid.
Xavi oo la hadlayay warbaahinta Spain ayaa si weyn u amaanay laacibkan, waxaana uu yidhi: “Kooxda da’yarta oo dhaan waanu la soconaa, Lamine-na waa ciyaartoy hibo badan, mashruuc ayaanu u haynaa isaga, waanu ku guuleysan karaa. Waxa uu leeyahay tayooyin badan, waxaanan rajaynayaa in uu nala joogi doono sannado badan; waxay ku xidhan tahay isaga, laakiinanigu waxa aan rajaynayaa in uu noqon doono ciyaartoy weyn mustaqbalka.”
Warbaahinta waddanka Spain ayaa sheegtay in waqti horeba ay Real Madrid diiraddeedu qabatay Lamine Yamal oo ay doonayaan inay la saxeexdaan iyaaga oo raacaya dariiqii sannadkii 2000 ay Luis FIgo kaga soo afduubteen Barcelona.
Figo oo ku guuleystay Ballon d’Or ayaa ka mid ah ciyaartoyda ugu fiicannaa taariikhda Barcelona marka laga eego goolsha iyo caawinta uu sameeyey, waxaana 248 ciyaarood oo uu u saftay uu u dhalyey 45 gool iyo 58 kale oo uu caawiye ka noqday.
Real Madrid ayaa waqtigaas iska garab martay Barcelona, waxaanay si toos ah ula xaajoofay Figo iyaga oo u gacan-dhaafaysa kooxdiisa. Figo ayaa soo dhoweeyey dalabka Real Madrid oo ku qasbay Barcelona in laga iibiyo Real Madrid oo iyaduna bixisay lacagtii lagu burburin karayay qandaraaskiisa.
Figo ayaa markii uu tegay Real Madrid halkiisa kasii waday in uu ahaado ciyaartoy muhiim ah, waxaana 245 ciyaarood oo uu u saftay uu u dhaliyey 57 gool iyo 92 kale oo uu caawiyey.
Lamine Yamal ayay hadda sidii oo kale doonaysaa Real Madrid inay ugu gacan-dhaafo Barcelona oo ay si toos ah ula xaajooto, si uu u yimaaddo kulliyadda La Fabrica iyadoo loo ballan-qaadayo in fursad laga siin doono kooxda koowaad oo uu raaci doono dariiqii Achraf Hakimi.
