Real Madrid ayaa u muuqata mid indho indhaynteeda ka wadata koobka aduunka iyadoo eeganaysa xiddigo tayo leh oo ay kala saxeexan karto sidii ay dhawr koob aduun oo horeba u samaysay.
Sida uu sheegayo haatan wargeyska Marca ee fadhigiisu yahay Madrid, khadka dhexe ee Argentina ee Enzo Fernandez uu yahay mid ay qabatay isha Real.
Marca ayaa sheegaya in Enzo yahay xiddiga ay Los Blancos dookha labaad ka dhigteen haddii ay waayaan saxeexa Jude Bellingham oo ay Borussia Dortmund ka doonayaan balse lala xidhiidhinayo kooxo kale oo badan.
Real Madrid ayaa sidoo kale hore loola xidhiidhinayay khadka dhexe ee Napoli ee Stanislav Lobotka, tababare Carlo Ancelotti ayaa doonaya inuu dib ula midoobo Slovakian-kaas oo uu Napoli laba sano kusoo maamulay.
Fernandez ayaa wacdarro kusoo dhigay Benfica tan iyo markii uu suuqii xagaagii kaga yimid dhinaca kooxda River Plate, 21 sano jirkaas ayaa kooxda Portuguese-ka ah 10 Milyan oo euro ugu soo biiray.
Enzo ayaa daqiiqad uusan waligii ilaawi doonin durba ka diiwaan gashaday koobkan aduunka maadaama oo uu gool muhiim ah kasoo dhaliyay Mexico oo ay 2-0 kaga adkaadeen dhawaan.
Shalay ayay ahayd markii saxafiga caanka ah ee Fabrizio Romano uu sheegay in Benfica 80 Milyan oo euro ka badan ku dalban doonto saxeexa Fernandez.
