Koxoda kubadda cagta Real Madrid ayaa beddelka labadeeda ciyaartoy ee Eden Hazard iyo Marco Asensio waxayka heshay horyaalka waddanka Talyaaniga ee Serie A, waxaanay hadda diyaar u tahay inay aqbasho in labadan xiddig iska baxaan bishan January.
Real Madrid ayuu qorshaheedu yahay inay heshiis cusub ka saxeexdo Marco Asensio oo qandaraaskiisu ku egyahay dhamaadka xilli ciyaareedkan, laakiin haddii wada-hadalladu ay guuleysan waayaan labada usbuuc ee soo socda, waxay Los Blancos suuqa dhigi doontaa xiddigan reer Spain.
Sidoo kale, waxay Real Madrid khaati ka taagan tahay Eden Hazard oo ay diyaar u yihiin in ay fasaxaan xagaagan, maadaama uu qaab ciyaareedkiisu aad u liito, isla markaana ka rajo dhigay tababare Carlo Ancelotti.
Los Blancos ayaa waxay dhinaca kale raadinaysaa ciyaartoygii u beddeli lahaa Hazard iyo Asensio haddii ay baxaan bishan January, waxaana la sheegay in Carlo Ancelotti uu ishaaqsaday, isla markaana doonayo inuu Santiago Bernabeu keeno xiddiga kooxda AS Roma ee Nocolo Zaniola.
23 jirkan oo sannadkii 2018 ay Roma £4 milyan oo kaliya kagala soo wareegtay Inter Milan ayaa bandhig heersare ah ka sameeyey horyaalka Serie A, isaga oo ku guuleystay abaal-marinta xiddiga da’yarka ee sannadka ee horyaalka Talyaaniga.
Xiddigan oo lugta bidix adeegsada ayaa xulka qaranka Talyaaniga u saftay 11 kulan, waxaana hadda la sheegayaa inuu doonayo inuu ka ciyaaro tartanka Champions League, taas oo soo yaraynaya fursaddii ay Roma ka qabtay inuu sii joogo.
Inkasta oo aan wali la ogaanin lacagta ay Real Madrid ku doonayso Zaniola, haddana laacibkan ayaa 127 kulan oo uu u saftay Roma waxa uu u dhaliyey 24 gool iyo 18 caawimood.
