Kooxda kubadda cagta Real Madrid ayaa si buuxda ula wareegi doonta xiddiga da’da yar ee reer Brazil ee amaahda kula joogay ee Vinicius Tobias, waxaanay bixin doontaa lacagtii lagu xidhay markii uu da’yarkani uga soo wareegay Shakhtar Donetski.
Vinicius Tobias oo ka ciyaara difaaca midig ayay da’diisu tahay 18 jir, waxaana uu xilli ciyaareedkan ka tirsanaa kooxda da’yarta Real Madrid ee Castilla oo uu bandhig heersare ah ka samaynayay, iyadoo uu gacanta ku hayay Raul Gonzalez oo ah tababaraha da’yarta Los Blancos.
Laacibkan reer Brazil ayaa markii ay Real Madrid kala soo wareegaysay Shakhtar waxay isla qaateen in haddii ay kooxda Spain ku qanacdo da’yarkan, in ay si buuxda ugula wareegi karto 10 milyan oo Euro, taas oo hadda uu Florentino Perez aqbalay inuu bixiyo.
Carlo Ancelotti ayaa doonaya in Vinicius Tobias uu usoo dallacsiiyo kooxda koowaad marka ay baasaboorka Spain qaataan ciyaartoyda ajaanibka ah ee hadda ka buuxinaya liiska xiddigaha aan midowga Yurub ka tirsanayn ee loo ogol yahay inay horyaalka LaLiga ka ciyaaraan.
Dani Carvajal oo muddooyinkii dambe ay dhaawacyo daashadeen iyo lucas Vazquez ayaa ah labada ciyaartoy ee Real Madrid uga ciyaara difaaca midig, waxaase sii weynaanaysa da’dooda taas oo keenaysa in ay diyaarsadaan beddelkooda.
Vinicius Tobias oo Real Madrid usoo wareegaymarkii uu bilaabmay duullaanka Ruushku ku qaaday Ukraine, ayaa waxa uu heshiiskiisa amaahdu soconayaa illaa June 30, 2014, waqtigaas ayaanay Real Madrid si buuxda ula wareegi doontaa, iyadoo inta kalena uu amaah ahaan ugu sii ciyaari doono.
