Kooxda kubadda cagta Real Madrid ayaa diyaar u ah inay qasnaddeeda u jabiso xiddig ka ciyaara horyaalka Premier League oo ay doonayaan inay ku beddelaan kubbad-sameeyaha reer Germany ee Toni Kroos oo mustaqbalkiisa shaki weyni ku jiro, isla markaana la sheegayo inay suurtogal tahay inuu ka fadhiisto kubadda cagta.
Real Madrid ayaa isku dayaysa inay ku qanciso Toni Kroos in uu heshiis cusub saxeexo oo uu kusii jiro kubadda cagta, laakiin laacibkan oo hore uga fadhiistay xulka qarankiisa ayaa illaa hadda ku adkaysanaya in aanu go’aan gaadhin.
Tababare Carlo Ancelotti ayaa la sheegay inuu haddaba sii bilaabay raadinta ciayartoygii u beddeli lahaa Toni Kroos haddii uu ku adkaysto inuu ciyaaraha ka fadhiisto, waxaana uu calaamadsaday xiddiga khadka dhexe uga ciyaara West Ham iyo England ee Declan Rice.
23 jirkan oo lagu qiimeeyey £150 milyan oo Gini, ayaa kooxdiisa West Ham kula jira heshiis soconaya illaa June 2024, kaas oo waliba uu la socdo dookh ah inay kordhin karaan 12 bilood oo kale oo dheeraad ah marka uu waqtigaas dhamaysto.
Kooxo badan oo horyaalka Premier League ayaa sidoo kale doonaya Declan Rice, sida Liverpool, Chelsea, Manchester United iyo Manchester City, hase yeeshee tababaraha Real Madrid ee Carlo Ancelotti ayaa la sheegay inuu si gaar ah u dalbaday laacibkan, sida uu qoray wargeyska El Nacional.
Real Madrid oo xagaagii uu ka tegay Casemiro oo u wareegay Manchester United ayaa waxay beddelkiisa usoo iibsatay Aurelien Tchouamni, hase yeeshee Luka Modric ayaa 37 jir ah oo sii gaboobaya, halka Toni Kroos uu mustaqbalkiisu laalan yahay.
