Weeraryahanka xulka qaranka Faransiiska iyo kooxda PSG ee Kylian Mbappe oo 24 jir ah ayaa noqday ciyaartoygii ugu goolasha badnaa shanta horyaal ee waaweyn ee Yurub sannadkii hore ee dhamaaday ee 2022, isaga oo kooxdiisa iyo xulkiisa u dhaliyey goolal aanay jirin cid kala sinnayd.
Mbappe ayaa 54 gool dhaliyey sannadkii dhamaaday oo uu ciyaaray 56 kulan, waxaana uu sidaas ku noqday ciyaartoyga goolasha ugu badan ka dhaliyey shanta horyaal ee waaweyn ee Yurub ee Premier League, La Liga, Ligue 1, Serie A iyo Bundesliga.
Kooxdiisa PSG ayuu u saxeexay 44 gool 43 ciyaarood oo dhamaan tartamada ah oo uu u saftay, kuwaas oo 32 ka mid ah ay ahaayeen horyaalka Ligue 1. Xilli ciyaareedkii 2021/22, ayuu ahaa laacibkii ugu goolasha badnaa horyaalka dalkaas.
44ka gool ee uu kooxdiisa PSG u dhaliyey ayaa waxa u raacay 12 gool oo kale oo uu sannadkii 2022 u dhaliyey xulka qarankiisa Faransiiska oo uu 13 ciyaarood u dheelay, kuwaas oo siddeed ka mid ah uu ka dhaliyey Koobkii Adduunka ee lagu qabtay Qatar ee uu ku guuleystay Kabta dahabka ah, isaga oo saddexlay ka dhaliyey finalkii uu Faransiisku rikoodheyaasha kaga qaaday Koobka.
Marka laga yimaaddo guulaha shaqsiga ah, Mbappe waxa uu sannadkii tegay kooxdiisa kula guuleystay horyaalka Ligue 1, balse waxa uu niyad-jab kaga baxay Champions League iyo Coupe de France ka hor intii aanu Koobkii Adduunkana ku guul-darraysan oo finalkii ay Argentina rikoodheyaal ku garaacday.
