Erik ten Hag ayaa soo saaray liiska ciyaartoyda Manchester United ee kulanka adag ee Axadda ay martida u noqonayaan Arsenal oo ay ku booqanayaan Emirates Stadium, iyadoo maanta gellinkii dambe ay u xidh-xidheen safarka ay ku tegayaan magaalada London.
Anthony Martial iyo Diogo Dalot ayaa ka maqan liiska ciyaartoyda Manchester United ee tareenka ugu safray magaalada London, iyadoo maxaddada tareenka lagu arkay dhamaan ciyaartoyda kale ee kooxda.
Weeraryahanka reer France ee Anthony Martial oo dhaawac kaga baxay waqtigii nasashada kulankii Manchester City ay 2-1 kusoo garaaceen toddobaadkii hore, ayaa hore uga maqnaa ciyaartii Crystal Palace.
Erik ten Hag ayaa weerarka dhexe u isticmaali doona Wout Weghorst oo ay u noqon doonto ciyaartii labaad ee xidhiidh ah ee uu ugu soo bilowdo United oo uu toddobaadkii hore uga soo wareegay kooxda reer Turkey ee Besiktas.
Waxa kale oo isaguna dhaawac muruqa ah ku maqan daafaca midig ee reer Portugal ee Diogo Dalot, taas oo fursad u noqonaysa Aan Wan-Bissaka oo bandhig heersare ah ka sameeyey ciyaartii Crystal Palace oo uu xakeemeeyey Wilfied Zaha.
Dhinaca kale, Jadon Sancho ayaa sidoo kale aan ka mid noqonin xiddigaha u safray United inkasta oo uu toddobaadkii hore kusoo laabtay tababarka kooxdiisa oo uu ka maqnaa muddo dheer.
Manchester United ayaa waxa kale oo ka maqnaanaya xiddiga khadka dhexe ee reer Brazil ee Casemiro oo kaadh digniin ah qaatay ciyaartii Crystal Palace, waxaana uu midkood beddeli doonaa Fred iyo Scott McTominay. Lisandro Martinez ayaa sidoo kale ka dheeli kara khadka dhexe oo uu kubbad-burburiye ka noqon karo, iyadoo booskaas uu 22 ciyaarood uga dheelay kooxdiisii hore ee Ajax.
Halkan kaga bogo liiska ciyaartoyda Manchester United ee kulanka Arsenal
De Gea, Heaton, Butland, Wan-Bissaka, Varane, Martinez, Lindelof, Maguire, Shaw, Malacia, McTominay, Mainoo, Fred, Eriksen, Fernandes, Elanga, Antony, Pellistri, Garnacho, Rashford, Weghorst.
