Tababaraha Netherlands Louis van Gaal ayaa xaqiijiyay in guuldaradii xulkiisa soo gaartay maanta inay aheyd kulankii ugu dambeeyay ee xirfadiisa tababarenimo inkastoo uu carabka ku adkeeyay in maanta aan laga badinin xulkiisa.
Van Gaal ayaa howlgabnimada ka soo laabtay si uu mar seddexaad taababare ugu noqdo Holland, laakiin haatan waa 71 jir wuxuuna dhawaan la tacaalayay cudurka kansarka
Si la mid ah Koobkii Adduunka ee 2014-kii lagu qabtay Brazil, rajadii xulkiisa waxa ay ku dhammaatay rigoorayaal ay kaga badiyeen Argentina, iyadoo Lionel Messi uu Argentina ku dhiirogeliyay guul ay ka gaareen xulkiisa Oranjada.
“Ma sii ahaan doono tababaraha xulka – kaliya waxaan aqbalay inaan waqtigaan qabto, sidaasi darteed waxay tani aheyd ciyaarteydii iigu danbeysay” ayuu Van Gaal ku xaqiijiyay shirkiisii jaraa’id ee ciyaarta ka dib.
“Waqti cajiib ah ayaan la qaatay xulka. Xanuun aad u daran ayay aheyd sida aan ku harnay, sababtoo ah waxaan sameeyay wax walba oo aan uga hortagi karnay inay nagu dhacdo.”
LVG ayaa ka tagaya Netherlands markii seddexaad isagoo aan hal kulan laga badinin tan iyo markii ugu danbeysay ee ay Argentina ku wajaheen Koobka Adduunka sideed sannadood ka hor.
Van Gaal ayaana wariyayaasha xusuusiyay xaqiiqdaas isagoo sheegay inuusan ku jirin dareen ah in laga badiyay kulankii maanta.
“20 kulan oo aan hogaamiyay xulka, hal kulan la igama badinin. Ma garanayo inta aan badinay, waxaad ka raadin kartaa Google. Uma maleynayo in maanta laga iga badiyay – rigoore badis ma ahan.”
