Tababarihii xulka Mexico Tata Martino ayaa shaqada xulka Mexico ka tagay ka dib markii ay soo dhamaatay ciyaartii ay 2-1 uga badiyeen Sacuudiga.
Mexico ayaa markii ugu horeysay muddo 44 sannadood ah waxaa lagu reebay wareega guruubyada Koobka Adduunka.
Ciyaarta ka dib tababaraha reer Argentina Tata Martino ayaa warbaahinta ku yiri: “Qandaraaskeyga Mexico wuxuu dhamaaday markii garsooraha uu yeeriyay seerigii ugu danbeeyay.”
Taageerayaasha xulka Mexico ayaa si weyn u saluugsanaa Tata Martino gaar ahaa markii la soo saaray isku aadka Koobka Adduunka.
Madaama uu tababaraha ka soo jeedo Argentina islamarkaana Mexico ay isku guruub noqdeen dalkiisa hooyo, taageerayaal badan ayaa ku eedeynayay intii aan la gaarin Koobka Adduunka inuu u janjeeri doono dalkiisa.
Mexico ayaa guuldarro ay ka soo gaartay Argentina taasoo sal u noqotay ka haritaankooda Koobka Adduunka inkastoo ay kulankii ugu danbeeyay ka badiyeen.
Dad badan ayaa su’aal ka keenay taatiko bedelkii uu sameeyay kulankii Argentina iyo sida uu xulkiisa u soo adkeeyay kulankii Sacuudiga inay aad u kala bedelanaayeen.
Tababaraha ayaa mas’uuliyada haritaanka xulka dusha saartay isagoo shir jaraa’id ku yiri:
“Anigaa ah sababta ugu weyn ee qalbijabka aan maanta wadaageyno. Waxaan qaadeynaa mas’uuliyada fashilkii Koobka Adduunka. Qandaraaskeyga wuxuu dhamaaday markii uu garsooraha yeeriyay seerigii ugu danbeeyay. Wax kale oo la sameeyo ma jiraan.”
