Xidhiidhka kubadda cagta Spain ayaa magacaabay garsooraha kulanka kooxaha isku magaalada ah ee Barcelona iyo Espanyol ee horyaalka LaLiga ee toddobaadkan, waxaana wadnaha farta ku haya jamaahiirta Barcelona oo aad u neceb garsoorahan oo hore uu uga qayliyey Lionel Messi.
Horyaalka Spain ee LaLiga ayaa la ciyaari doonaa Khamiista, Jimcaha iyo Sabtida, waxaanay laba jugood isku raaceen Barcelona oo hore looga ganaaxay Robert Lewandowski oo saddexda ciyaarood ee Espanyol, Atletico Madrid iyo Getafe maqnaan doona.
Jugta labaad ayaa ah in garsoore Mateu Lahoz loo magacaabay ciyaartooda koowaad ee ay dib ugu soo laabanayaan horyaalka maalinta koowaad ee sannadka cusub.
Mateu Lazho oo ay da’diisu tahay 45 jir ayaa la xasuusan yahay in uu ahaa xaakimkii kulankii Argentina iyo Netherlands ee wareegga siddeedda Koobka Adduunka oo uu bixiyey 18 kaadh oo huruud ah oo mid uu u beddelay casaan, taas oo keentay in FIFA ay dalkiisa usoo dirto oo laga saaro liiska garsooreyaashii semi-finalka iyo finalka.
Lionel Messi ayaa ciyaartaas kaddib saxaafadda si toos ah ugaga hadlay Mateu Lahoz oo uu sheegay in aanay ahayn in garsooreyaal noocaas oo kale ah ay yimaaddaan Koobka Adduunka. Frenkie de Jong ayaa isaguna ciyaartaas qayb ka ahaa oo garsooraha marar badan saluug ka muujiyey heerka caddaaladdiisa.
De Jong ayaa waxa uu ku sheegay Lahoz inuu yahay mid fadeexad ah ku ah koobka adduunka, isla markaana waqtigii dheeraadka ahaa ee lagu daray ciyaartaas oo rikoodheyaal ku dhamaatay uu Lahoz illoobay garsoorenimada.
Si kastaba ha ahaatee, Barcelona oo aad u neceb Lahoz ayaa loogu dhiibay kulanka dagaalka ah ee kooxda ay isku magaalada yihiin ee Espanyol.
