Waxaa maanta la soo gabagabeeyay kulamadii Group C iyo Group D ee Koobka Adduunka iyadoo ciyaarihii caawa la ciyaaray ay Argentina xaqiijisatay u soo bixitaankeeda wareega 16ka Koobka Aduunka ka dib markii ay karbaasheen Poland.
Argentina ayaa 2-0 ku dardartay xulka Poland taasoo ka dhigeysa inay 6 dhibcood uga soo baxeen Group C, waxayna wareega 16ka isku dhacayaan xulka Australia oo kaalinta labaad uga soo baxay Group D ka dib markii ay ka badiyeen Denmark.
Waxaa iyagana caawa wareega 16ka Koobka Adduunka u soo gudbay xulka Poland oo nasiib ku soo baxay inakstoo ay isku dhibco noqdeen xulka Mexico oo guul 2-1 ka soo garay Sacuudi Areebiya.
Poland iyo Mexico ayaa yeeshay min afar dhibcood, laakiin Poland ayaa farqiga goolasha oo hal gool ah ku soo baxday iyadoo Sacuudiga uu dhamaadkii ciyaarta la degay Mexico oo uu gool ka soo ceshtay.
Mexico iyo Sacuudiga ayaana ka haray Group C halka Argentina iyo Poland ay u gudbeen wareega 16ka.
Poland waxay wareega 16ka Koobka Adduunka la ciyaareysa xulka ku soo baxay kaalinta koowaad ee Group D France oo ah xulka difaacanaya Koobka Adduunka.
Kulamada La Xaqiijiyay Ilaa Iyo Haatan Ee Wareega 16ka Koobka Adduunka:
Sabti 3da Disember
Netherlands vs USA
Argentina vs Australia
Axad 4ta Disember
England vs Senegal
France vs Poland
