Xiddiga reer Brazil ee Raphinha ayaa difaacay xiddiga dhaawaca u jiifa ee Neymar Jr oo seegaya kulamada ka hadhsan wareegga group-yada Koobka Adduunka, kaddib markii uu kuraanta lugta midig dhaawac kasoo gaadhay ciyaartii Serbia.
Neymar ayaa shalay la xaqiijiyey in uu ka maqnaan doono labada ciyaarood ee Switzerland iyo Cameroon oo ay ku wada jiraan Group G, hase yeeshee waxa la filayaa inuu taam u noqon doono kulamada xiga ee wareegga 16ka haddii uu xulkiisu usoo baxo.
Dhakhtarka xulka qaranka Brazil ayaa xaqiijiyey, in Neymar iyo Danilo ay dhaawacyo isku mid ah ka qabaan kuraanta sidaas darteedna ay la tacaalayaan xaaladdooda, waxaase uu niyaad-samaan ka muujiyey soo laabashadiisa wareegga 16ka.
Raphinha oo kusoo bilowday ciyaartii Serbia ayaa sii weyn u amaanay Neymar, waxaase uu weeraray taageereyaasha xulka qaranka Brazil oo uu sheegay in aanay garab istaagin xiddigoodan, si la mid ah sida ay reer Argentine u garab istaagaan Lionel Messi.
“Taageereyaasha Argentina waxay Messi ula dhaqmaan sidii uu yahay boqor, taageereyaasha reer Portugal-na waxay Cristiano Ronaldo ula macaamilaan sida inuu yahay Boqor, laakiin reer Brazil lugaha ayay ka jabiyaan Neymar, murugo weynaa.” Ayuu yidhi Raphinha oo qoraal ku daabacay bartiisa bulshada.
Raphinha ayaa intaa ku daray: “Qaladka u weyn ee Neymar uu sameeyey waa inuu u dhashay Brazil, waddankiisu uma qalmo hibadiisa oo kale iyo kubaddiisaba.”
Hadalka Raphinha ayaa imanaya iyadoo dad badanay Neymar ugu cadhaysan yihiin inuu si badheedh ah u galay siyaasadda oo uu waliba taageeray Madaxweynihii dhowaanta lagaga adkaaday doorashada ee Jair Bolsonaro oo ay dad badan oo reer Brazil ahi ku tilmaameen cunsuri, isla markaana aan waxba ka qaban xanuunkii COVID-19 oo ay dalkaas ugu geeriyoodeen in ka badan 700,000 qof.
