Garabka weerar ee kooxda Barcelona iyo xulka Brazil ee Raphinha ayaa warkiisa caddeeyay kaddib guushii Spanish Supercopa ee ay xalay ka gaadheen Real Madrid.
Raphinha ayaa lix bilood kaliya jooga Barca isagoo suuqii xagaaga kaga soo biiray Leeds United balse intaaba waxa wax kala duwan laga qorayay mustaqbalkiisa.
Barcelona oo dhaqaale ahaan aan fiicnayn ayaa la sheegay inay diyaar u tahay inay iska iibiso Raphinha haddii ay dalab wanaagsan u hesho maadaama sidii ay ka filaysay uu ula qabsan waayay.
26 sano jirkaas ayaa ilaa haatan 23 kulan usoo ciyaaray Barcelona xilli ciyaareedka isagoo saddex gool soo dhaliyay.
Arsenal ayaa la sheegay inay saxeexa Raphinha oo ay suuqii xagaaga weyday haatan u laaban karto gaar ahaan kaddib markii ay Chelsea u weyday Mykhailo Mudryk oo ay mudo dheer doonaysay.
Si kastaba, Raphinha oo hadlay kaddib guushii ay Real Madrid ka gaadheen xalay ayaa mustaqbalkiisa dheer ku tiriyay Barca oo uu xusay inuu koobab badan la doonayo.
“Kani waa koobkaygii koowaad ee aan la qaado kooxdan weyn, maaliyadan weyn ee Barcelona, waa cajiib haatana waxaanu u socona koobab kale oo badan” ayuu yidhi Raphinha.
