Waddanka martigelinaya Koobka Adduunka ee Qatar ayaa shaaciyey inay gacan ku dhigeen oo ay qabteen maandooriyeyaal dalkaas lasoo geliyey oo la doonayay in taageereyaashu ay isticmaalaan, kaddib markii la mamnuucay in waddankaas lagu dhax isticmaalo khamriga iyo maandooriyeyaasha kale.
Garoonka diyaaradaha ee Hamad International Airport, qaybtiisa kastamada ayaa waxay sheegtay, inay qabatay kiniinka loo isticmaalo xanuun baabi’iyaha ee Tramadol oo ay tiradiisu gaadhayso illaa 1990 xabbo oo kiniin ah iyo sidoo kale xashiishad caddadkeedu dhan yahay 464.5 kiiloo garaam,
Dawladdu ma sheegin halka uu ka yimid iyo cidda sidatay maandooriyeyaashan, hase yeeshee waxa war qoraal ah oo lagu baahiyey Twitter-ka lagu sheegay in maandooriyeyaashan laga soo dejiyey garoonka oo ay qabteen.
Warka ayaa intaa ku daray, in waaxda kastamyadu ay ka shakiyeen qof rakaab ah oo ay baadhitaan ku sameeyeen shandadihiisa, kaddibna ay ka heleen waxyaabahan mamnuuca ah.
Shaqsiga rakaabka ah oo aan lasoo bandhigin magaciisa iyo waddanka uu u dhashay ayay Qatar sheegtay inay maxkamadda hor geyn doono maadaama uu meel kaga dhacay shuruucda waddanka iyo caqiidooyinka Islaamka ee seeska u ah sharciyada dalkaas.
Kiniinka Tramdol ee loo isticmaalo xanuun baabi’iyaha oo ay dhallinyarada qaarkood siyaabo qaldan u qaataan oo ay ku sakhraamaan ayaa waxa sannadka 2024 ay hay’adda la dagaallanka maandooriyeyaasha ee dhinaca ciyaaruhu ay ku dari doontaa waxyaabaha ka mamnuuca ah ciyaartoyda ee aanay isticmaali karin xataa marka ay xanuunsanayaan, haddii ay dhacdana ay ku mutaysan doonaan ganaax waqti dheer ah oo ay garoomada kaga maqnaan doonaan.
Goolhayihii hore ee Liverpool ee Chris Kirkland ayaa sannadkii hore waraysi uu bixiyey waxa uu ku sheegay inuu ku sigtay inuu geeriyoodo markii uu isticmaalay daawada Tramadol oo ka badan tankiisii ama intii loogu talo-galay.
