Horyaalka waddanka Ingiriiska ee Premeir League ayaa iska diiday oo aan qaadan doonin sharciga cusub ee xidhiidhka kubadda cagta FIFA uu soo saaray ee laga dhaqan-geliyey Koobka Adduunka, kaas oo saamayntiisa laga dareemay kulamadii illaa hadda la ciyaarayy.
Kulamadii koowaad ee wareegga group-yada ee Koobka Adduunka, ayaa waxay lagu daray waqti badan oo dheeraad ah markii ay ciyaaruhu dhamaadeen labadii qayboodba.
Pierluigi Collina oo ah madaxa garsooreyaasha FIFA, ayaa sheegay in ay xaqiijinayaan, in daqiiqad kasta oo ku luntay si aan habboonayn ay tahay in la ciyaaro, taasina keentay in kulamada qaarkood ay socdaan in ka badan 100 daqiiqadood, halkii ay ka ahayd in ay ku dhamaadaan min 90 daqiiqadood.
Maamulka garsooreyaasha Premier League ee PGMOL ayaa go’aan ka gaadhi doona inay hirgeliyaan sharciga FIFA ee ah in aanay jirin daqiiqad si bilaash ah ku lunta, haddii ay dhacdana ciyaarta xagga dambe lagaga sii daro, iyadoo celcelis ahaan ay jireen dhawr kulan oo Koobka Adduunka ah oo kusoo dhamaaday 102 daqiiqadood iyo 42 ilbidhiqsi, taas oo afar daqiiqadood ka badan inta laga diiwaangeliyey horyaalka Premier League.
Garsooreyaasha horyaalka Premier League ayaa ka tashan doona inay hirgeliyaan sharcigan iyo in kale ka hor inta aanu dib u bilaabmin horyaalka Premier League dhamaadka bisha December, hase yeeshee waxa la sheegayaa in ay intooda badan kasoo horjeedaan oo aan la ansixin doonin fulinta waqtiga badan ee dheeraadka ah ee lagu darayo ciyaaraha.
Pierluigi Collina ayaa isagu rumaysan in waqtiga badan ee lagu darayo ciyaaraha Koobka Adduunku ay yihiin daqiiqadihii ay ciyaartoydu lumiyeen iyo intii ay kubaddu dibedda uga baxday garoonka amaba ay si kale ku istaagtay, laakiin aanay ahayn waqti dheeraad ah oo lagu daray ciyaarta.
Arrintan ayaa waxay imanaysaa iyadoo ay hore u jirtay dood ahayd in waqtiga ciyaaraha lagu soo koobo 60 daqiiqadood, balse Pierluigi Collina iyo sharcigiisa cusub ee Koobka Adduunka ayaa waxay keentay in waqtigu uu gaadho 100 daqiiqadood iyo ka baadan.
Waa hadal wanagsan ha iska dayan