Horyaalka waddanka Ingiriiska ee Premier League ayaa isbeddel ku samaynaya isticmaalka muuqaalka garsoor caawiyaha ee VAR, kaddib casharo ay kasoo barteen Koobkii Adduunka ee Axaddii lagu soo gabogabeeyey waddanka Qatar.
Mushkilado badan ayaa ka jiray isticmaalka VAR iyadoo qaladaad badan laga arkayay tan iyo markii la bilaabay isticmaalkeeda xilli ciyaareedkii 2019-20.
Inkasta oo Premier League uu ka mid yahay horyaallada ugu garsoorka fiican, haddana marar badan ayay cabasho ka keeneen kooxuhu go’aamada qaarkood, taas oo hadda la bilaabayo sidii horumar looga samayn lahaa, iyadoo la casriyeynayo muuqaal caawiyaha VAR.
Koobkii Adduunka ayaa laga dhaxlay duruus caawin doonta horyaallada marka laga eego dhinaca isticmaalka VAR, waxaana bilowgaba tallaabooyin qaadaya horyaalka Premier League oo dalbaday in laymanka offside-ka loo xoojiyo sidii Koobka Adduunka.
Tababareyaal badan iyo ciyaartooyo ayaa cabashooyin ka muujiyey go’aamada tababareyaasha Koobkii Adduunka, sida Argentina oo garsooraha Spain ee Mateu Lahoz aad uga cadhootay iyo England oo garsooraha Brazil ee Sampaio ka dhiidhiday kaddib ciyaartii Faransiisku ku reebay wareegga siddeedda.
Si kastaba, horyaalka Premier League ayaa waxa uu hirgelinayaa isbeddello dhinaca offside-ka ah oo xooggan oo ciyaartoyda si fiican u kala saaraya marka ay noqoto sida ay u kala horreeyaan, iyadoo meesha ay soo gelayaan ciyaartoyda oo loo ekaysiinayo sidii kuwo Robot oo kale ah.
