Cristiano Ronaldo ayaa shabaqa soo taabtay kulankoodii furitaanka ee Group H ee ay ka badiyeen xulka Ghana. Wuxuu sidoo kale dhigay rikoodh cusub isagoo noqday ciyaaryahankii ugu horeeyay ee gool ka dhaliya shan Koob Adduun oo kala duwan.
Laakiin waxaa jiray muuqaal laga qabtay xiddiga Portugal oo maanta qabsaday baraha bulshada islamarkaana falcelin badan laga sameeyay.
Daqiiqadii 36aad ee ciyaartii shalay, Cristiano Ronaldo ayaa gacanta geliyay buumihiisa isagoo sheey kala soo baxay ka hor inta uusan cunin.
Tan iyo markii muuqaalka uu ku faafay baraha bulshada waxaa laga sameeyay maad badan iyadoo si weyn looga hadlayay waxa uu Cristiano Ronaldo sameynayay iyo wixii uu cunay waxa ay ahaayeen.
Warbaahinta Portugal oo xiriir la sameysay xulkooda ayaa soo ogaaday wixii uu Ronaldo cunay ee uu ku sitay buumihiisa.
Waxay sheegeen inuu cunay kaniini yar oo tamarta ka caawiya, islamarkaana uu kaniinyadaas ku keydsado buumaha si uu u cuno inta ay ciyaarta socoto.
Portugal ayaa guul bilaabatay Koobka Adduunka ka dib markii ay 3-2 kaga badiyeen Ghana, waxa la ciyaarayaan South Korea iyo Uruguay kulamada kale ee Group H.
