Xiddiga da’da yar ee xulka qaranka England ee Phil Foden ayaa tilmaamay ciyaartoyga ay isku xulka yihiin ee awoodda u leh inuu noqdo xiddiga ugu fiican adduunka ee khadka dhexe ka ciyaara, kaddib markii uu wacdaro ka dhigay kulamadii Koobka Adduunka ee uu dalkiisu ciyaaray.
England ayaa xalay 3-0 ku burburisay Senegal waxaanay u gudbeen wareegga siddeedda oo ay isku dhaceen xulka awoodda badan ee Faransiiska oo uu midkood usoo gudbi doono afar-dhamaadka, midka kalena tartanka macasalaamayn doono.
Foden oo kusoo bilowday kulankii Senegal ayaa waxa uu si weyn u amaanta ka haysan waayay laacibka da’da yar ee khadka dhexe ee Jude Bellingham oo 19 jir ah, laakiin la isku raacsan yahay inuu yahay ciyaartoyga ugu shaqada badan xulka England ee Koobka Adduunka.
Bellingham ayaa ciyaar tayadeedu sarrayso soo bandhigay kulankii Senegal oo ay ka garab ciyaarayeen Declan Rice iyo Jordan Henderson, waxaana Phil Foden oo saxaafadda la hadlayay ciyaarta kaddib uu amaanay Bellingham, isaga oo yidhi: “Ma doonayo in aan si weyn sare ugu qaado Jude Bellingham, sababtoo ah wali wuu da’ yar yahay, waxase uu ka mid yahay ciyaartoyda ugu hibada badan ee aan abid arko.
“Anigu ciyaartiisa kuma arag meel ay ka liidato. Wax kasta ayuu leeyahay, waxa uu noqon doonaa dhaxda ugu wanaagsan dunida, waana hubaal.”
Jude Bellingham oo kooxdiisa Borussia Dortmund kula jira heshiis soconaya illaa sannadka 2025, ayaa waxa doonaya naadiyo badan oo ay ka mid yihiin Real Madrid, Liverpool, Chelsea iyo xataa Paris Saint-Germain, waxayse kooxda reer Germany dalbanaysaa lacag gaadhaysa £129 milyan oo Gini.
