Tababaraha kooxda Manchester City ee Pep Guardiola ayaa weerar ku qaadi doona kooxaha tartanku kala dhaxeeyo ee Arsenal iyo Chelsea suuqyada soo socda isagoo ka doonaya daafac bidix.
Xiddigaha uu Pep isha ku hayo ee kooxahaas ka tirsan ayaa kala ah Ben Chilwell iyo Kieran Tierney xilli ay Sky Blues wali ku dhiban yihiin doorkaasi daafaca bidix.
Wargeyska The Athletic ayaa sheegaya in Guardiola uusan wax kalsooni ah ku qabin Sergio Gomez oo ay suuqii xagaaga Andrelecht kala soo wareegeen.
Gomez ayaa kaliya shan kulan oo uu bedel kusoo galay kasoo muuqday Premier League xilli ciyaareedkan balse afar kulan Champions League kusoo bilawday.
Dhinaciisa Chilwell ayaa isagu 14 kulan xilli ciyaareedkan u dheelay Chelsea isagoo badi ku maqnaa dhaawac muruq ah halka Tierney uu booskiisii Arsenal u waayay Oleksandr Zinchenko oo isla Man City ka tagay.
Pep ayaa booska daafaca bidix xilli ciyaareedyadii ugu dambeeyay si joogto ah ugu adeegsanayay Joao Cancelo oo isagu wacdarro kasoo dhigayay.
