Pep Guardiola ayaa u mahad-celiyey Joao Cancelo iyo Rodrigo kaddib ciyaartii ay Chelsea guusha cidhiidhiga ah ka gaadhay Chelsea ee ay kusoo yareeyeen farqiga dhibcaha ay Arsenal kaga hayso hoggaanka. Laban ciyaartoy ayaanu Guardiola geynin boosas cayiman, waxanu xorriyad u siiyey inay meesha ay doonaan ka ciyaaraan.
City ayaa kusoo gashay saddex difaac qaybtii hore, waxaana hore loo diray Rodri iyo Cancelo oo garabka midig ee weerarka la geeyey, laakiin taatikadaasi uma shaqaynin Guardiola, waana sababta uu waqtigii nasashada u sameeyey beddelka degdegga ah.
Rico Lewis iyo Manuel Akanji ayaa soo galay qaybtii labaad iyadoo la saaray Joao Cancelo iyo Kyle Walker, waxn Gurdiol uu qirtay in aanu ku faraxsanayn sidii ay kooxdiisu ula ciyaartay Chelsea, sababtuna ay ahayd boosaska qaldan ee ay ka dheeleen Rodri iyo Cancelo.
“Kulamadii aanu ciyaarnay intii ka dambaysay koobka adduunka ee Liverpool, Leeds iyo Everton waxa aanu u ciyaaraynay si fiican, laakiin maanta [xalay] qaybtii hore ma aanaan fiicnayn” Ayuu yidhi Pep Guardiola, waxaanu kusii daray: “Waxa aan go’aansaday in aanan laba ciyaartoy geynin boosaskooda. Waxa aan u malaynayay in Joao iyo Rodri ay kordhin doonaan dedaalkooda marka ay ka ciyaaraan boosas kale. Waxa aan qiyaasay ciyaar nooc kale, khaasatan haddii ay shan difaac ku ciyaarto Chelsea sida mararka qaarkoodba dhacda, sidaas darteed ayaanu u doonaynay in aanu ka faa’iidaysano baallahayaga Joao iyo Kyle.
“Qaybtii hore ma aanaan fiicnayn, waanu liidanay kubbadahana ma aanaan geynayn garbaha iyo khadka dhexe ee weerarka, mana aanaan samaynayn fursado badan, cidhiidhigayaguna wuxuu ahaa mid liita. Ma aanaan ahayn kuwo si fiican u habaysan.”
