Kabtanka xulka qaranka Croatia ee Luka Modric ayaa digniin u diray xiddig ka tirsan xulka Brazil ee berri Jimcaha iskaga hor imanayaan wareegga siddeedda Koobka Adduunka, waxaana uu u sheegay in uu illoobi doono saaxiibtinimadii iyo ixtiraamkii ka dhexeeyey, isla markaana uu nolosha ku adkayn doono.
Brazil iyo Croatia ayay midkood iska xaadirin doontaa semi-finalka Koobka Adduunka, halka midkooda kalena uu isaga oo ciyaartoydiisu ay ooyayaan uu tartanka macasalaamayn doono.
Luka Modric ayaa saxaafadda hor yimid maanta, waxaana uu ka jawaabay su’aalo laga weydiiyey ciyaartoyda ay isku kooxda yihiin ee xulka Brazil, waxaana uu qirtay in marka uu xulkiisa u ciyaarayo in uu illoobayo saaxiibtinimada oo uu dagaal kala hor tegayo, isaga oo si gaar ah ula hadlayay Vinicius Junior.
“Ka hor tegista saaxiibkayga Real Madrid ee berri? Waxa aanu ahaan karnaa Friends kaddib ciyaarta, laakiin inta hore qof walba waxa uu u dagaallamayaa waddankiisa. Waxa aanu samayn doonaa wax walba oo karaankayaga ah si aanu u guuleysano.
“Vinicius? Waxa noo taalla shaqo adag si aanu u joojino isaga berri. Qof walba wuu ogyahay tayadiisa, laakiin haddii anigu aan caawin karo si aan nolosha ugu adkayno, waxa aan siin doonaa faahfaahinta, waanan hubaa in aan samayn doono. Dhamaantayo waxa aanu halkan u joognaa in aanu u dagaalanno waddankayaga. Way fiican tahay in aan maqlo Neymar oo aniga iga hadlaya, sababtoo ah waa wiil wanaagsan oo aanu leenahay xidhiidh qurux badan. Waxa uu ciyaarayaa kubbaad qaabkeedu cajiib yahay, horumar badanna wuu sameeyey.”
