Tababaraha Sacuudi Areebiya Herve Renard ayaa shaaca ka qaaday inuu garanayo sida lagu aamusin karo Lionel Messi.
Xiddigaha Renard ee Sacuudiga ayaa noqday xulka kaliya ee garaacay Argentina Koobkaan Adduunka iyagoo 2-1 kaga badiyay bishii la soo dhaafay.
Messi ayaa goolka furitaanka dhaliyay laakiin labo gool oo degdeg ah oo Sacuudiga ay dhaliyeen ayaa sabbatay lama filaankii ugu weynaa ee Koobka Adduunka abid.
Waxaa taasi ka sii daran inay ku guuleysteen inay aamusiyaan xiddiga Paris Saint-Germain, kaasoo marka laga soo tago rigooradii uu dhaliyay aan wax kale ciyaarta ku kordhinin.
Laakiin tan iyo guuldaradaas, Messi wuxuu ciyaarayaa kubad ka timid duni kale, isagoo Argentina soo gaarsiiyay finalka oo ay la ciyaarayaan France.
35 jirkaan ayaa wadar ahaan dhaliyay shan gool halka uu seddex caawin sameeyay, wuxuuna shabaqa soo taabtay kulan walba oo knockout ah.
Laakiin tababaraha Sacuudiga Renard ayaa aaminsan inuu ogyahay sirta lagu celin karo Messi.
Wuxuu u sheegay wargeyska L’Equipe: “Inaad celiso Messi waxaad u baahan tahay inaad cadaadis saarto isku xirihiisa ugu muhiimsan De Paul.
“Waa qasab inaad Messi ka fogeyso goolka 35 ilaa 40 mitir, islamarkaana aadan u ogolaanin inuu kubada si raaxo leh u qabsado.
“France waxaa howshaas u qabtay Matuidi sannadkii 2018kii. Haatan waxaa si la mid ah u sameyn kara Rabiot iyo Tchouameni.”
Faransiiska ayaa 4-3 ku garaacay Argentina kulankii wareega 16ka Koobkii Adduunka ee 2018kii ka dhacay dalka Ruushka.
