Liverpool ayaa markale war aan wanaagsanayn ka heshay garabkeeda weerar ee Luis Diaz oo ay filanaysay inuu dhaawac uga soo kabto kahor bilaabashada sanadka cusub ee 2023.
Xiddiga ree Colombia ayaa dhaawac jilibka ahi ku gaadhay kulan ay Arsenal la ciyaareen bishii October kaas oo soo afmeeray sanadkiisa.
Si kastaba, Diaz oo qayb ka ahaa xiddigaha Liverpool ee magaalada Dubai tababarka ku samaynaya ayaa dib u dhac ku yimid soo kabashadiisa oo markale ku laabtay UK oo uu qaliin jilibka ah ku maray.
Ma cadda wakhtiga uu garoomada ka maqnaan doono markale balse ugu yaraan laba bilood oo kale ayaa la filayaa inuu maqnaado sida uu sheegayo wargeyska Mundo Deportivo.
Taas ayaa ka dhigan inuu maqnaan doono ugu horreynba kulanka lugta hore ee wareega 16-ka Champions League oo ay Real Madrid la ballansan yihiin 21-ka February balse wuxuu fursad u heli karaa lugta labaad ee 15-ka March.
Diaz ayaa qayb ka ahaa xiddigaha Reds ee kusoo bilawday kulankii Final-ka Champions League ee xilli ciyaareedkii hore ay Los Blancos guuldarrada kala kulmeen.
