Xiddiga reer Brazil ee Neymar ee u jiifa dhaawaca ayaa waxa ku dhacay xanuun sii xumaynaya rajadiisii uu ka qabay inuu kusoo laabto xulka dalkiisa oo uu u ciyaaro kulamada Koobka Adduunka ee wareegga 16ka iyo marxaladaha kasii dambeeya haddii ay usoo baxaan.
Neymar oo uu dhaawac kasoo gaadhay kuraanta ciyaartii koowaad ee Koobka Adduunka ee ay Serbia 2-0 ku garaaceen, ayaa waxa uu ka maqnaa ciyaartii Switzerland ee Isniintii, iyadoo uu awoodi waayey inuu yimaaddo garoonka 974 Stadium. Sidoo kale, ciyaarta Jimcaha ee Cameroon ayaanu qayb ka noqon doonin.
Tababaraha xulka qaranka Brazil ee Tite iyo garabka weerarka ee Vinicius Junior ayaa xaqiijiyey in ka sokow dhaawaca uu Neymar u jiifo xanuun ku dhacay oo u diiday inuu yimaaddo garoonka ciyaartii Switzerand.
Neymar ayaa la sheegay in ay ku dhacday xummad daran oo uu kasoo bixi kari waayey hotelka ay ciyaartoyda xulka Brazil deggan yihiin, waxaanu ciyaartii Switzerland ka daawanayey telefishanka.
Garabka weerarka Real Madrid ee Vinicius Junior oo ciyaarta kaddib wax laga weydiiyey xaaladda Neymar ayaa yidhi: “Neymar waxa uu joogay hotel, waxaana haysay xummad. Dhamaantayo waxa aanu ugu ducaynaynaa inuu si degdeg ah uga soo kabto xanuunka iyo dhaawaca.”
Vinicius ayaa gool dhaliyey ciyaartii Switzerland, waxaana uu u dabbaal-degay sidii Neymar oo kale, hase yeeshee VAR ayaa diidday goolkaas.
Neymar ayaa qoraal uu ku daabacay bartiisa bulshada waxa uu ku yidhi: “Gool heersare ah ayuu ahaa. Waa ceeb in aan goolkaas la xisaabin, laakiin way mahadsan yihiin ciyaartoydayadu.”
