Xiddiga u soo baxay xulka Netherlands ee Cody Gakpo ayaa qirtay inay wax walba suurtogal tahay bisha Janaayo isagoo diiday inuu meesha ka saaro inuu u wareegayo Manchester United.
Weeraryahanka PSV Eindhoven ayaa wacdarro ka dhigaya Koobka Adduunka ee Qatar isagoo labo gool u dhaliyay xulka Holland ilaa iyo haatan.
Qaab ciyaareedkiisa ayaa soo jiitay kooxaha waa weyn ee qaarada Yurub iyadoo suuqa kala iibsiga uu furmayo bisha Janaayo ee sannadka cusub.
United ayaa u baahan weeraryahan cusub ka dib markii uu ka tagay Cristiano Ronaldo, iyagoo xagaagii isku dayay saxiixa Gakpo.
Si kastaba, Erik ten Hag ayaa weli xiiseynaya saxiixa Gakpo, kaasoo haatan sheegay inuu u furan yahay inuu u wareego Old Trafford bisha Janaayo.
“Haatan waxaan diirada saarayaa Koobka Adduunka” ayuu ku sheegay shirkiisa jaraa’id.
“Mar walba waa wax aad u fiican in la maqlo wararka xanta ah laakiin diiradeyda halkay ayay saaran tahay iyo inaan shaqadeyda ugu fiican qabto. Kama xishoodo wararka xanta ah. Laakiin kubada waa mid kooxeed ee ma ahan mid shaqsi ah.”
Markii la weydiiyay haddii uu u wareegayo Manchester United, Gakpo ayaa yiri:
“Waan arki doonaa waxa dhaca bisha Janaayo. Wax walba waa suurtogal.”
