Difaax xulka qaranka France ee Ibrahima Konate ayaa shaaciyey farriin qoraal ah oo uu ka helay Trent Alexander-Arnold ka hor ciyaarta wareegga siddeedda Koobka Adduunka ee France vs England, taas oo kusoo beegmaysa saddex maalmood ka hor ciytaartooda.
Les Blues ayaa waajahaysa Three Lions, waxaana xulalka Didier Deschamps iyo Gareth Southgate ay ka mid yihiin dalalka aadka loogu saadaalinayo inay ku guuleysan doonaan Koobka, inkasta oo midkood uu tartanka ku macasalaamayn doono wareegga siddeedda.
Ibrahima Konate oo u warramayay warbaahinta RMC Sport ee waddanka Faransiiska ayaa sheegay in uu farriin qoraal ah uu Trent Alexander-Arnold ugu soo diray telefoonka gacanta, taas oo wixii ku qornaa uu saxaafadda la wadaagay, waxaanu yidhi: “Xafiiltankayagu [France vs England] muddo dheer ayuu soo jiray, markii aan xulka da’yarta ee 16-jirrada ka tirsanaa waxa aanu la ciyaarnay England, waxaanay ahayd ciyaar ka duwan.
“Xafiiltankayagu wuu jiray tan iyo waqtigaas. Alexander-Arnold waxa uu farriin qoraal ah iigu soo diray ‘waa inoo Sabtida oo aynu is-arki doono walaal’, sababtoo ah aad ayaanu iskugu dhow nahay isaga.”
France iyo England kuma aanay kulmin Koobka Adduunka tan iyo sannadkii 1982kii, waxaana tartankii weynaa ee iskugu dambeeyey ee ay isku arkeen uu ahaa Euro 2012.
