Lionel Messi ayaa qirtay in Argentina ay isku dhex yaacday ka dib guuldaradii lama filaanka ku aheyd ee ka soo gaartay Sacuudi Areebiya kulankii Koobka Adduunka ee ka dhacay Lusail Stadium.
Messi ayaa sidoo kale qirtay in durbaba rajadooda Koobka Adduunka ay xariiqda dul saaran tahay.
Messi ayaa rigoore hogaanka ugu dhiibay Argentina qeybtii hore ee ciyaarta ka hor inta aysan Sacuudiga labo gool degdeg ah afar daqiiqo gudaheed hogaanka kula wareegin qeybtii labaad ee ciyaarta.
Sacuudi Areebiya ayaana hogaankeeda ilaashatay ilaa dhamaadkii ciyaarta taasoo ka saaciday guul taariikhi leh oo ay ka gaareen Argentina.
Argentina durbaba xaalka ayaa ku xun madaama ay u harsan yihiin kulamo adag oo ay la ciyaarayaan xulalka Poland iyo Mexico.
Ciyaarta ka dib, Messi ayaa warbaahinta ku yiri: “Shan daqiiqo oo aan qaladaad sameynay waxaan dhuminay hogaanka waxaana is aragnay anagoo 2-1 na lagu hogaaminayo. Waan isku dhex yaacnay, waxaan noqonay kuwa karoosyo uun ku tuuraya xerada goolka, waxayna ciyaarta nagu noqotay mid adag.”
Messi ayaa hadalkiisa raaciyay inaysan jirin marmarsiiyo ay xulkiisa sameyn karaan inkastoo seddex gool offside looga diiday.
“Waan arkay in offside-yadu ay ahaayeen kuwa cadaalad ah. Ma aanan arkin muuqalada laakiin haddii la diiday waxay dabcan ahaayeen go’aano sax ah. Marmarsiiyo ma jirto.”
Isagoo ka hadlayay xulka Sacuudiga, Messi ayaa yiri: “Waan ogeyn inay ahaayeen koox haddii aan u ogolaano inay ciyaaraan, si fiican u dheeli kara, waxayna nagu riixeen difaacooda adag.”
