Arsenal ayaa kulan saaxiibtinimo oo kamida qorshayaasheeda inta koobka aduunku socdo la ciyaartay kooxda heerka labaad ee England ee Watford.
Ciyaartaas oo albaabadu u xidhnaayeen kana dhacday xerada tababarka Arsenal ayaa kusoo dhammaatay 4-2 iyadoo Watford guusha la hoyatay.
Mikel Arteta ayaa qaybta hore ee kulanka shax xoogan kusoo galay isagoo kusoo bilaabay 11-ka xiddig ee kala ah Hein; Cedric, Holding, Gabriel Magalhães, Tierney; Elneny, Lokonga; Ødegaard, Nelson, Marquinhos; Nketiah.
Qaybta hore ee xiddigaha kooxda koowaad ahi u dheelayeen ayay Arsenal hoggaan 2-1 ah ka haysay kooxda tababare Slaven Billic kaddib goolal ka yimid Eddie Nketiah iyo Marquinhos.
Intaas kaddib Arteta ayaa doortay inuu isbedelo sameeyo isagoo tobban bedel sameeyay soona geliyay kulanka qaar kamida da’yarta kooxda laakiin goolal ay dhaliyeen xiddigaha Watford ee Keinan Davis, Yaser Aspirilla iyo Joao Pedro ayay kulanka dhinaca kale ugu rogeen Hornets.
Daafaca Ben White oo sababo shaqsi ah uga soo tagay xulka England ee koobka aduunka ayaan la filayn inuu durba ku biiro xiddigaha kooxdiisa Arsenal ee isku diyaarinaya qaybta dambe ee xilli ciyaareedka.
Gunners ayaa sidoo kale shalay helay warka aan u fiicnayn ee ah inuu dhaawac jilibka ahi gaadhay weeraryahan Gabriel Jesus.
