Harry Maguire ayaa fursad ka heli doona Manchester United haddii Argentina ay ku guuleysato Koobka Adduunka.
Tababare Lionel Scaloni iyo ciyaartoydiisa ayaa la filayaa inay dib ugu laabtaan caasimada Argentina ee Buenos Aires Talaadada si ay u dabaaldegaan haddii ay ku guuleystaan Koobka Adduunka markii seddexaad.
Laakiin waxaa taasi keeni doontaa in daafaca Manchester United Lisandro Martinez iyo afar xiddig kale oo Argentina ah inay seegaan kulamada Premier League ee maalinta Boxing Day.
Maqnaanshaha daafaca Lisandro Martinez waxay albaabka u furi doontaa Maguire inuu dib ugu soo laabto shaxda tababare Erik ten Hag isagoo ciyaari lagu soo bilaabi karo kulanka Nottingham Forest ee 27ka December.
Maguire ayaana ku duceysanaya in Argentina ay ku guuleysato Koobka Aduunka si Lisandro Martinez uu u helo fasax dheeri ah taasoo ka caawineysa inuu ku soo laabto shaxda kooxda.
Sidoo kale waxaa caawin karta in Varane uu France kula guuleysto Koobka Adduunka laakiin Raphael Varane ayaa si dhaqso ah ugu soo laaban kara England madaama France ay deris yihiin Ingariiska halka Argentina ay tahay duulimaad waqti dheer ah oo dhowr wadan loo marayo.
Si la mid ah tababaraha United Erik ten Hag, tababarayaasha Antonio Conte, Unai Emery, Pep Guardiola iyo Roberto De Zerbi ayaa waayi doona xiddigo muhiim u ah haddii Argentina ay badiso.
Conte iyo taageerayaasha Spurs ayay dhabarjab ku noqon doontaa haddii Cristian Romero oo dhaawac kaga maqnaa shan kulan ka hor Koobka Adduunka islamarkaana Koobka Adduunka taam u noqday oo ciyaaray dhamaan lixdii kulan uu sidoo kale seego kulanka ay la ciyaarayaan Brentford.
