Bernando Silva ayaan asxaabtiisa xulka Portugal kula biirin dabaaldega goolkoodii 1aad ee uu dhaliyay Goncalo Ramos madaama uu ka cabsi qabay in Switzerland ay gool ka dhaliso iyaga.
Goncalo Ramos ayaa Portugal hogaanka u dhiibay ka dib baas uu ka helay xiddiga Atletico Madrid Joao Felix.
Laakiin Silva ayaa garoonka ku sii negaaday halka asxaabtiisa Portugal ay ku dabaaldegayeen taageerayaasha agtooda.
Sababta uu xiddiga Manchester City u diiday inuu dabaaldega ku biiro ayaa aheyd cabsi uu ka qabay in gool degdeg ah laga dhaliyo.
Sharciga FIFA ayaa dhigaya in ciyaarta ay dib u bilaaban karto haddii kooxda goolka dhalisay aysan ku jirin qeybta garoonka ee kooxda goolka laga dhaliyay.
Madaama ay ciyaartoyda Portugal garoonka ka wada baxeen, waxaa loo xisaabin lahaa inaysan ku jirin qeybta garoonka ee Switzerland taasoo u ogolaan laheyd Switzerland inay ciyaarta dib u bilowdo.
Sidaan oo kale waxaa Koobkii Adduunka ee 2018kii sameeyay Kieran Trippier oo ku negaaday garoonka xilli xiddigaha kale ee England ay u dabaaldegayeen goolkii uu Harry Kane ka dhaliyay Tunisia.
Si kastaba, sharci yaqaanada kubada cagta ayaa sheegaya in sharciga 8aad ee kubada cagta inuu dhigayo in ciyaarta ay dib u bilaaban karto kaliya in ciyaartoyda goolka dhalisay ay dhamaantood kuwada jiraan qeybtooda garoonka.
Taasoo la micno ah in Silva uu awoodi karay inuu dabaaldega kula biiro asxaabtiisa isagoo aan ka baqeynin in Switzerland ay ciyaarta dib u bilowdo.
Laakiin 28 jirkaan ayaa diiday inuu riski geliyo goolkooda isagoo ku negaaday garoonka qeybta Switzerland islamarkaana Ramos ugu hambalyeeyay garoonka dhexdiisa.
