Soo laabashadii Cristiano Ronaldo ee Manchester United waxay ahayd mid fashil ah, laakiin saaxiibkiisii hore ee Real Madrid ee Casemiro ayaa kooxda ka dhaqaya calool-xumadii ay u hayeen Cristiano Ronaldo, waxaana uu si dhab ah u muujiyey saamayn weyn oo hadda gaadhay heer ay durba taageereyaashu ku tilmaamaan halyeyga Old Trafford.
United ayaa Casemiro waxay £70 milyan oo Gini kaga soo iibsatay Real Marid, balse dad badan ayaa su’aal ka keenay sababta ay kooxdu lacagta intaas le’eg ugu kharash garaysay ciyaartoy ay da’diisu tahay 30 jir, balse muddo kooban ayuu isagu lugtiisa ku bixiyey jawaabta kuwii shakiga gelinayay.
Casemiro oo ah qalbiga khadka dhexe ee Manchester United ayaa waxa uu sawirkiisa dhabta ah taageereyaasha tusiyey ciyaartii Manchester City oo uu sameeyey ficil cajiib ah markii ay guusha gacanta ku dhigeen isaga oo dhinaca kalena ahaa halbowle la halgamay xiddigihii khadka dhexe ee Man City oo dhaqaaqi waayey.
Kubbad-burburiyahan ayaa markii ay goolka dhaliyeen waxa uu u tegay taageereyaasha Manchester United oo uu ku dheg-dhegay, si weyna ula dabbaal-degay waxaana jamaahiirta kooxda ee aan waqtigaa la socon wixii uu sameeyey ay xilli dambe ka arkeen muuqaal kooban oo lasoo geliyey baraha bulshada oo ay si aad ah uga falceliyeen.
Jamaahiirta kooxda ayaa sidoo kale markii uu laynka garoonka ku dabbaal-degayay waxay u kaceen xiddiga Brazil oo la isku-raacsan yahay in isaga iyo Christian Eriksen ay yihiin kuwa isbeddelka ugu badan ku sameeyey Manchester United.
Si kastaba ha ahaatee, siddeeddii sannadood ee uu Casemiro joogay kooxda caasimadda Spain ee Real Madrid ayaa waxa uu kusoo guuleystay wax walba oo suurtogal ahaa sida Shan Champions League, saddex horyaal oo LaLiga iyo koobab kale oo maxalli ah.
