Halyeyga reer France ee William Gallas ayaa amaan kula dul-dhacay xiddig ka tirsan xulka qaranka England oo khadka dhexe ka ciyaara ka hor ciyaarta adag ee wareegga siddeedda Koobka Adduunka ee dalkiisu uu ka hor tegayo Ingiriiska.
Labada xul ee awoodda badan ee England iyo France ayaa isku dhacay, waxaana uu midkood u gudbi doonaa semi-finalka halka uu waddanka kalena macasalaamayn doono tartanka.
William Gallas oo ka mid ahaa xiddigihii xulka Faransiiska ee Koobkii Adduunka 2006 ee finalka soo gaadhay, ayaa waxa uu sheegay in aanu muddo dheer arag khad dhexe oo la mid ah laacibka khadka dhexe uga ciyaara England ee Declan Rice oo uu tababare Gareth Southgate kusoo bilaabay dhamaan afartii kulan ee Ingiriisku ciyaaray illaa hadda.
23 jirkan oo West Ham u saftay 215 ciyaarood oo dhamaan tartamada ah, una dhaliyey 11 gool iyo 12 caawimood oo uu sameeyey, ayaa waxa uu William Gallas ku tilmaamay ciyaartoy aan baqasho lahayn, tayadiisuna sarrayso.
“Declan Rice waxa uu ku jiraa xulka England, mana jirto cid ka hadlaysa isaga, laakiin waa ciyaartoy aan la rumaysan karin.” Ayuu yidhi William Gallas, waxaanu sii raaciyey: “Waxa uu qabanayaa isla shaqadii West Ham oo kale, mana garanayo sababta uu wali halkaa [West Ham] usii joogo.
“Muddo dheer ma arag khad dhexe oo isaga oo kale ah, waa ciyaartoy xooggan, awood badan oo farsamadiisana aan la rumaysan karayn.”
