Mucjisada khadka dhexe ee xulka qaranka Morocco ee Azzedine Ounahi ayaa kusii jeeda horyaalka Premier League, xilli ay jiraan kooxo badan oo ay ka mid tahay Barcelona oo si weyn u doonaya, kaddib bandhigga cajiibka ah ee uu ka sameeyey Koobka Adduunka.
Luis Enrique ayaa Azzedine Ounahi ku sifeeyey ciyaartoyga ka yaabiyey intii uu socday Koobka Adduuunku, waxaana uu ahaa laacibkii kala gooyey khadka dhexe ee Spain ciyaartii wareegga 16ka ee ay rikoodheyaasha ku reebeen.
Azzedine Ounahi oo ka mid ah xiddigaha Morocco ay u diyaarsatay kulanka caawa ee Faransiiska ee semi-finalka Koobka Adduunka, ayaa waxa bisha January uu u dhaqaaqi doonaa horyaallka Premier League sida uu kusoo warramayo telefishanka Sky Sports, waxaana qasnaddeeda u jabinaysa Leicester City oo ka bixinaysa 45 milyan oo Euro.
Wargeyska L’Equipe ayaa waxa uu isaguna xaqiijiyey, in Leicester City ay diyaarisay dalab weyn, iyadoo ciyaartoygan oo qiimaha uu suuqa ka taagnaa ka hor Koobka Adduunku uu ahaa 3.5 milyan oo Euro uu hadda marayo 45 milyan oo Euro oo uu qiimihiisu cirka isku shareeray usbuucyo kooban gudahood.
