Xulka Morocco ayaa guul taariikhi ah oo aysan ilaawi doonin ka gaaray xulka lagu naaneeso Shayaadiinta Cas Cas ee Belgium iyagoo ku garaacay 2-0 islamarkaana hogaanka u qabtay Group F.
Morocco oo barbaro ku bilaabatay Koobka Adduunka ayaa baadigoobeysay guusheedii ugu horeysay Koobka Adduunka ee muddo ka badan 20 sannadood.
Ciyaarta qeybteedii hore ayaa lagu kala nastay barbaro goolal la’aan ah, laakiin tababaraha xulka Morocco ayaa bedelo sameeyay qeybtii labaad taasoo wax weyn ka bedeshay ciyaartooda.
Sabiri oo bedel ku soo galay ayaa hogaanka u dhiibay Morocco daqiiqadii 73aad ka dib markii uu Courtois ka dhaliyay kubad laad xor ah aheyd, iyadoo dabaaldega goolka uu ruxay garoonka.
Belgium ayaa goolka ka dib isku dayaysay inay ciyaarta ku soo noqoto, laakiin weerarkeeda waxa uu ahaa mid aan ilko laheyn oo bilaa natiijo ah.
Morocco ayaana ciyaarta hurdo u dirtay waqtigii dhimashada ciyaarta markii xiddiga kale ee bedelka ku soo galay Aboukhlal uu shabaqa meel kore ka toogtay ka dib kubad loo soo celiyay.
Waxay ciyaarta ku soo dhamaatay 2-0 oo ay Morocco ku suuldaartay xulka Belgium oo halis ku jira haatan inkastoo ay badiyeen kulankoodii furitaanka ee Group F.
Morocco ayaa gaartay guusheedii ugu horeysay ee Koobka Aduunka tan iyo 1998kii, waana guushoodii 3aad abid ee Koob Adduuka inkastoo ay ciyaareen 18 kulan.
Morocco waxay guruubka ku hogaamineysaa afar dhibcood, halka Belgium ay ku jirto kaalinta labaad iyagoo leh 3 dhibcood. Balse isbedel ayaa imaan kara madaama Canada iyo Croatia ay goordhow ciyaari doonaan.
Morocco waxay dan weyni ugu jirtaa in Canada iyo Croatia ay barbaro galaan kulankoooda maanta.
