Morocco ayaa ka dalbaday xidhiidhka kubadda cagta adduunka ee FIFA in lagu celiyo ciyaartii semi-finalka Koobka Adduunka ee Faransiisku uu kaga badiyey 2-0, taas oo ay ku doodeen in lagula kacay caddaalad-darro.
Laba gool oo labadii qaybood ay kala dhaliyeen Theo Hernandez iyo Randal Kolo Muani ayaa Faransiiska siiyey guul 2-0 ah, halka Morocco oo taariikh cusub ka samaysay Koobka Adduunka ay sidaas ku hadhay, iyaga oo noqday dalkii ugu horreeyey ee Afrikaan ah ee soo gaadha semi-finalka.
Saacado kaddib ciyaartii Faransiiska, Morocco ayaa dacwad ka gudbisay garsoorihii ciyaarta hayay ee Cesar Ramos oo ay sheegeen in uu kula kacay go’aamo caddaalad-arro ahaa, isla markaana uu ka eexday, waxaanay ka dalbadeen FIFA in lagu celiyo ciyaartaas.
Xidhiidhka kubadda cagta Morocco ayaa war-saxaafadeed uu soo saaray waxa uu ku sheegay, in garsoore Cesar Ramos uu ka diiday rikoodhe caddaan ahaa qaybtii hore markii uu Theo Hernandez lugta ku dhuftay Sofiane Boufal. Garsoore ayaa kaadh digniin ah siiyey Boufal halkii uu uga dhigi lahaa rikoodhe.
War-saxaafadeedka uu soo saaray xidhiidhka kubadda cagta Morocco ayaa waxa kale oo lagu sheegay in garsoorihii dhexe ee ciyaarta iyo garsoorka VAR ay labaduba sameeyeen qaladaad waaweyn, sidaas darteedna ay tahay in lagu celiyo ciyaartaas oo loo dhiibo garsooreyaal dhexdhexaad ah.
Waxa kale oo uu xidhiidhka kubadda cagta Morocco sheegay in khubaro badan oo garsoor oo dib u daawaday go’aamadii ciyaarta, gaar ahaan qaladkii weynaa ee Theo Hernandez iyo Boufal.
Marrocco