Walow kulamada wareega 16-ka ee Champions League u muuqdaan kuwo wakhti ka hadhay haddana dhaawacyada halista ah ee xiddigaha qaar haatan sii gaadha ayaa saamayn kara ka qayb qaadashadooda ciyaarahaas.
Waa si lamid ah sida ay Liverpool uga werwersan tahay hoggaanka daafacooda ee Virgil Van Dijk oo dhaawac muruqa ahi ku gaadhay kulankii ugu dambeeyay ee Brentford.
Van Dijk ayaa wakhtigii nasashada ee kulankaas lagu bedelay Joel Matip, il-wareedka BBC Sports ayaa shaaciyay in Van Dijk uu dhakhtar takhasus ah ula kulmayo xaalada dhaawaciisa muruqa.
Marka hore dhaawaca Virgil ayaan loo arkayn wax weyn balse qiimaynta dambe ee lagu sameeyay ayaa muujinaysa inuu ka halis badan yahay sidii la filayay.
Virgil ayaa la filayaa inuu dhaawacan haleelay ugu yaraan hal bil garoomada kaga maqnaado, taas ayaa ka dhigan inuu soo kaban karo laba toddobaad kahor kulamada Champions League ee Real Madrid.
Haddiiba uu dhaawaca 31 sano jirkaasi ugu yaraan dib u dhac galo oo soo kabashadiisu hakato ayuu shaki gali doonaa ka qayb qaadashada lugta koowaad ee Real Madrid.
Walow ay Liverpool bedelka Van Dijk u haysato xiddigo tayo leh sida Matip iyo Konate haddana Van Dijk ayaa ah hoggaanka weerarkooda, la’aantii ayay ku dhibtoon doonaan celinta Karim Benzema.
