Halyeygii xulka qaranka Uruguay iyo kooxaha Manchester United, Villarreal iyo Atletico Madrid ee Diego Forlan ayaa sharraxay sida ay u kala awood badan yihiin labada xul ee France iyo Brazil oo safka hore kaga jira dalalka loo saadaalinayo inay ku guuleysanayaan Koobka Adduunka ee ka socda Qatar.
Brazil iyo France ayaa usoo gudbay wareegga 16ka Koobka Adduunka, waxaanay ku kala dhaceen South Afrika iyo Poland, hase yeeshee jidka loo marayo finalka ayaa ah mid adag oo waddan walba looga baahan yahay nasiib iyo inuu soo bandhigo awooddiisa ugu sarraysa.
Diego Forlan oo xulka qarankiisa Uruguay hoggaaminayay Koobkii Adduunka 2022, ayaa daawade ka ahaa qarankiisa oo sannadkan ku hadhaya wareegga koowaad ee group-yada.
Waraysi ayuu siiyey wargeyska L’Equipe ee kasoo baxa waddanka Fransiiska, waxaana la weydiiyey midka wanaagsan labada dal ee Brazil iyo France oo mid walba dhinaciisa ay dhaawacyo u ragaadiyeen, isla markaana xiddigo muhiim ah ay ka baxeen intii uu socday tartanka Koobka Adduunku.
Diego Forlan oo ka jawaabayay su’aal ahayd midkee xooggan Brazil & France ayaa yidhi: “France ayaa woxoogaa ka xoog badan Brazil. Xataa waxay si fiican ugu qalabaysan yihiin inay ku guuleystaan Koobka Adduunka.”
Forlan ayaa waxa kale oo uu magacaabay ciyaartoyda uu haysto xulka France ee awoodda u leh inay u hoggaamiyaan Koobka Adduunka, waxaanu yidhi: “Waxay haystaan ciyaartooyo tayo leh, sida Mbpape, Griezmann, Giroud, Camavinga iyo xataa tababare Deschamps.”
